މި އެއްބަސްވުމުގައި ސޮއިކުރެއްވީ އެމްއެމްއޭގެ ގަވަރުނަރު އަހުމަދު މުނައްވަރު އަދި އާރުބީއައިގެ ގަވަރުނަރު ޝްރީ ޝަކްތިކަންތާ ދާސް އެވެ.
ކަރަންޓް އެކައުންޓް މުއާމަލާތްތަކުގައި އަދި ހުއްދަކުރެވޭ ކެޕިޓަލް އެކައުންޓު މުއާމަލާތްތަކާއި އެހެނިހެން ވެސް އިގުތިސާދީ، މާލީ މުއާމަލާތްތައް ދެގައުމުން އެއްބަސްވާ ގޮތެއްގެ މަތީން ދިވެހި ރުފިޔާ އާއި އިންޑިއާ ރުޕީސް އިން ކުރުމަށް މި އެއްބަސްވުމުން ބާރުއަޅަ އެވެ.
އަދި ގައުމުގެތަކުގެ އަމިއްލަ ފައިސާ ބޭނުންކުރެވޭ ގޮތްވުމުން ހަރަދުކުޑަވެ ސެޓްލްމަންޓަށް ހިނގާ ވަގުތު އަވަސް ވެގެންދާނެ ކަމަށްވެސް އެމްއެމްްއޭއިން ވަނީ ބުނެ އެވެ.
ރައީސް ޑރ. މުއިއްޒު މިދިޔަ އޮކްޓޫބަރު މަހުގެ ތެރޭގައި އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން ވަނީ އިންޑިއާ އާއި ރާއްޖެއާ ދެމެދު ކުރެވޭ ފައިސާގެ މުއާމަލާތްތަކުގައި ކޮންމެ ގައުމަކުން އެ ގައުމެއްގެ އަމިއްލަ ފައިސާ ބޭނުންކުރުމާ ގުޅޭގޮތުން މުހިއްމު މަޝްވަރާތަކެއް ބާއްވަވާފަ އެވެ. އެގޮތުން އިންޑިޔާއާއެކު 30 ބިލިއަން ރުޕީސްގެ ކަރަންސީ ސްވޮޕު އެއްބަސްވުމެއް ވަނީ ހަދައިފަ އެވެ.
އިންޑިޔާއަކީ ނިމުނު އަހަރު އެންމެ ގިނައިން މުދާ ރާއްޖެ އިމްޕޯޓުކުރި ގައުމެވެ. ނަމަވެސް މި އަހަރު އިންޑިޔާއިން ރާއްޖެއަށް މުދާ އިމްޕޯޓުކުރި މިންވަރު ދަށްވެފައިވާކަން އެމްއެމްއޭގެ ހިސާބުތަކުން ދައްކަ އެވެ.
ނިމުނު އަހަރު އިންޑިޔާއިން 366.6 މިލިއަން ޑޮލަރުގެ މުދާ އިމްޕޯޓުކޮށްފައިވާއިރު މި އަހަރު އެ ގައުމުން އިމްޕޯޓުކޮށްފައިވަނީ 350.4 މިލިއަން ޑޮލަރުގެ މުދަލެވެ. އެއީ އަހަރުން އަހަރަށް ބަލާއިރު ހަތަރު އިއްސައްތަ ދަށްވުމެކެވެ.
