އިދިކޮޅު ކޯލިޝަނުން ހަައުސިން މިނިސްޓަރު މުހައްމަދު އަސްލަމަށް ފޮނުވި ސިޓީގައި ބުނީ ރައީސް އަބްދުﷲ ޔާމީންގެ ވެރިކަމުގައި މަސައްކަތް ފަށާ ގާތްގަނޑަކަށް ނިމުމަކާއި ހަމައަށް ގޮސްފައިވާ ސަލްމާން މިސްކިތް ހުޅުވުން ލަސްވާތީ އެކަމުގެ ކަންބޮޑުވުންތައް އެ ކޯލިޝަނާ ހިއްސާކޮށްފައިވާ ކަމަށެވެ.
އެ ކަންބޮޑުވުންތަކާއި ގުޅިގެން، މިސްކިތުގެ މަސައްކަތް މިހާރު ކުރިއަށް ގޮސްފައިވާ މިންވަރާއި، މިސްކިތުގެ މަސައްކަތްތައް ކުރިއަށް ދާގޮތް ބަލާލުމަށް ކޯލިޝަނުން ބޭނުންވާ ކަމަށާއި އެހެންކަމުން، އެ ކޯލިޝަނުގެ ލީޑާޝިޕްގައި ހިމެނޭ 20 ފަރާތަކަށް އެ މިސްކިތަށް ޒިޔާރާތްކޮށް މިސްކިތުގެ މަސައްކަތްތައް ހިނގަމުންދާ ގޮތް ބެލުމުގެ އިންތިޒާމުތައް ހަމަޖައްސައިދިނުމަށް ވަނީ އެދިފަ އެވެ.
މިއަހަރުގެ ރޯދަ މަހުގެ ތެރޭގައި އެ މިސްކިތް ހުޅުވާނެ ކަމަށް ކުރިން އިސްލާމިކް މިނިސްޓްރީން ބުނި ނަމަވެސް ކޮވިޑް-19 އާ ގުޅިގެން މިސްކިތް ހުޅުވުން ވެސް ލަސްކުރި އެވެ.
ފަސް ފަންގިފިލާއަށް އިމާރަތްކޮށް ނިމިފައިވާ ކިންގް ސަލްމާން މިސްކިތުގެ ހުރިހާ ފަންގިފިލާއެއްގައި ވެސް ވަނީ ކާޕެޓް އަޅާފައެވެ. އަދި މިހާރު މިސްކިތު އިމާރާތުގެ ހުރިހާ މަސައްކަތެއް ނިމި، މިސްކިތް ވަނީ ޕްލޭނިން މިނިސްޓްރީއާއި ހަވާލު ކޮށްފައެވެ.
އާޓިފިޝަލް ބީޗްގެ އުތުރަށް އޮންނަ ބިމުގައި، އަޅާފައިވާ މި މިސްކިތުގެ އަގު 24.95 މިލިޔަން ޑޮލަރަށް އަރާނެ އެވެ. މިސްކިތުގައި އަރާފޭބުމަށް ލިފުޓު ހަރުކޮށްފައިވާއިރު އެއްފަހަރާ 10،000 މީހުންނަށް ނަމާދުކުރެވޭނެ އެވެ. ލައިބްރަރީއަކާއި ކްލާސްރޫމްތަކުގެ އިތުރުން ސެމިނާ ރޫމްތައް ވެސް މި މިސްކިތުގައި ހުންނާނެ އެވެ.
މިސްކިތަށް ދާ މީހުންގެ ވެހިކަލްތައް ޕާކު ކުރުމަށް 44،100 އަކަފޫޓުގެ ޖާގައެއް ހަދާނެ ކަމަށްވެސް ހައުސިން މިނިސްޓްރީން ކުރިން ވަނީ ބުނެފަ އެވެ.
