ސީއެންއެމްއަށް މައުލޫމާތު ދެއްވަމުން ނައިފަރު ކައުންސިލްގެ މެމްބަރު މުހައްމަދު ކަރީމް ވިދާޅުވީ ކައުންސިލުން މިއަދު އެ މަސައްކަތް މޮނިޓާ ކޮށްފައިވަނީ ހައުސިން މިނިސްޓްރީގެ ބޭފުޅަކަށް އެ މަސައްކަތް މޮނީޓާ ކުރުމަށް މިދުވަސްވަރު ވަޑައިނުގެންނެވޭތީ ކަމަށެވެ.
ކައުންސިލްގެ ފަރާތުން ތިން ބޭފުޅަކު އެ ސަރަހައްދަށް ގޮސް މަސައްކަތް ކުރިއަށްދަނީ ރަނގަޅަށްތޯ އާއި ކޮންކްރީޓް އެޅުމުގެ މަސައްކަތް ރާވާފައިވަނީ ކޮންސްޓްރަކްޝަން ގަވާއިދާ އެއްގޮތަށްތޯ ބެލިފައިވާ ކަމަށެވެ. މަސައްކަތް މޮނިޓާކުރުމަށްޓަކައި އެ ސަރަހައްދަށް ކައުންސިލްގެ ތިން ބޭފުޅުން ވަޑައިގެންފައިވަނީ ކޮވިޑް-19 އިން ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައްވެސް އަޅައިގެންނެވެ.
ކަރީމް ވިދާޅުވީ ބަލިން ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައް އަޅައިގެން އެ ސަރަހައްދަށް ގޮސްފައިވަނީ ހައުސިން ޔުނިޓް މަސައްކަތް ކުރުމަށް ޓަކައި އާރްސީސީން މާލެ ގެނައި 14 ބިދޭސީ މަސައްކަތްތެރިންގެ ތެރެއިން އެކަކު ކޮވިޑް-19 އަށް މިދިޔަ މަހު ފަހުކޮޅު ޕޮޒިޓިވް ވެފައިވާތީ ރައްކާތެރިވުމުގެ ގޮތުން ކަމަށެވެ. އެމީހާ މިހާރު ހުރީ ވަކިތަނެއްގައި ކަރަންޓީގައި ކަމަށްވެސް ކަރީމް ވިދާޅުވިއެވެ.
ބިދޭސީ މީހާ ޕޮޒިޓިވްވެފައި ވަނީ މަލެއިން އައިސް ހޯމް ކަރަންޓީންގެ 14 ދުވަސް ފުރިހަމަ ކުރުމަށްފަހު ނެގި ސާމްޕަލްތަކަށް ފަހު ކަމަށް ކައުންސިލުން ބުނެއެވެ. އެހެންވުމުން އެ ސަރަހައްދަކީ އާއްމުންވެސް ވަނުން މަނާ ސަރަހައްދެއް ކަން ކަރީމް ފާހަގަކުރެއްވި އެވެ.