ޝަރީއަތްތައް ހުޅުވާލައިގެން ބޭއްވުމަކީ އެދޭކަމެއްކަމަށް ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވެއްޖެ އެވެ.

ޝަމީމް ކުރެއްވި ޓްވީޓްގައި ވިދާޅުވެފައިވަނީ، ސިއްރުކުރަން ޤާނޫނުގައި ހުރި މައްސަލަ ފިޔަވައި ދެންހުރި މައްސަލަތަކުގައި ލުއި ގޮތްތަކެއް ހޯދައިދޭން ޖެހޭ ކަމަށެވެ. އަދި މައްސަލަތަކަށް ވަންނަ ނޫސްވެރިންނަށްވެސް ލުއި ގޮތްތަކެއް ހޯދައި ދޭންޖެހޭ ކަމަށް ޝަމީމް ވިދާޅުވި އެވެ.

"ސިއްރުކުރަން ޤާނޫނުގައި ހުރި މައްސަލަ ފިޔަވައި، ޝަރީޢަތަށް ވަންނަން ވަކި ވަގުތެއްގެ ކުރިން ފޯމު ފުރުމާއި، ވަނުމަށްފަހު ނުނިކުމެވުން ފަދަ ކަންކަން ނުވާނެ ގޮތަކަށް އިދާރީ ލުއިތަކެއް އޮންނަންޖެހޭ. ނޫސްވެރިންނަށް އެމީހުންގެ އަމިއްލަ ނޯޓުފޮތް ވެއްދެންޖެހޭ." ޝަމީމްގެ ޓްވީޓްގައި ވެއެވެ.

މީގެ އިތުރުން ޝަމީމް ވިދާޅުވީ، ރާއްޖޭގައި ހިނގާ ހުރިހާ ޝަރީޢަތެއް، ޢާންމުންނަށް ހުޅުވާލައިގެން ބޭއްވޭ އަހަރަކަށް މިއަހަރު ވުމަކީ އެދޭކަމެއް ކަމަށެވެ. އަދި އިތުބާރު ބޮޑު ކުރެވޭނީ ހާމަކަންބޮޑު ކޮށްގެން ކަމަށްވެސް ޝަމީމް ވިދާޅުވި އެވެ.

2020 އަހަރަކީ، ރާއްޖޭގައި ހިނގާ ހުރިހާ ޝަރީޢަތެއް، ޢާންމުންނަށް ހުޅުވާލައިގެން ބޭއްވޭ އަހަރު ކަމަށް ހެއްދެވުމަކީ އަޅުގަނޑު ވަރަށް އެދޭކަމެއް.އެ މަސައްކަތް އެމަގަށް ހިންގުމަށްޓަކައި @PGO_MV އިން ދޭންއޮތް ހުރިހާ އެއްބާރުލުމެއް ދޭނަން. އިތުބާރު އިތުރު ކުރެވޭނީ ހާމަކަން ބޮޑުކޮށްގެން

— Hussain Shameem (@HuShameem) January 12, 2020