ވެށިފަހި މާލޭގެ މަޝްރޫއުގެ ދަށުން ތިން ކެޓަގަރީއަކުން ބިިމާއި ފްލެޓު ދޭން ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސަރުކާރުގައި އިއުލާންކޮށް، އެކި މީސްމީހުންނަށް ލިޔުން ދޫކުރި އެވެ. އެމްޑީޕީގެ ވެރިކަން ނިމުމުން ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް އެ މަޝްރޫއު ކުރިއަށް ގެންދިޔަ އެވެ.
ނަމަވެސް ކުރީގެ ސަރުކާރުތަކުން އެ ޕްރޮގްރާމް ހިންގުމުގައި އިހުމާލުވެފައިވާ ކަމަށް ޕްލޭނިން އަދި ހައުސިން މިނިސްޓަރު މުހައްމަދު އަސްލަމް ވަނީ މަޖިލީހުގައި ވިދާޅުވެފަ އެވެ. އެގޮތުން އެ މަޝްރޫއުގެ ދަށުން ދޭން ނިންމި ފްލެޓާއި ގޯތީގެ ލިޔެކިޔުންތައް ސަރުކާރުގެ އިދާރާތަކުން ފެންނަން ނެތް ކަމަށް އަސްލަމް ކުރިން ވިދާޅުވި އެވެ.
އިއްޔެގެ މަޖިލީހުގެ ޖަލްސާއަށް ވެސް އަސްލަމް ހާޒިރުވެ ވަޑައިގެންފައި ވާއިރު އަނެއްކާ ވެސް ވަނީ ވެށިފަހި މާލެ ޕްރޮގްރާމުގެ މައްސަލަ ފެންމަތިވެފަ އެވެ. ދާންދޫ ދާއިރާގެ މެމްބަރު ޔައުގޫބް އަބްދުﷲ ސުވާލުކުރެއްވީ އެ ޕްރޮގްރާމުގެ ގޯތި ދޫކުރަމުންދާ ގޮތާ ބެހޭ ގޮތުންނެވެ.
"އެންމެ ފަހުން ވަޒީރު މަޖިލީހަށް ވަޑައިގެންނެވި ދުވަހު ހެންވޭރު އުތުރު ދާއިރާގެ އިއްޒަތްތެރި މެމްބަރު އިބްރާހިމް މުއިއްޒު ކުރެއްވި ސުވާލާ ގުޅިގެން، އެ ދުވަހު މިނިސްޓަރު ވިދާޅުވީ 250 ގޯތި ވެށިފަހި ޕްރޮގްރާމުގެ ދަށުން ދޫކުރާ ކަމަށް. އެ ގޯތިތަކުގެ ތެރެއިން ބާކީ އިން ފަސް ގޯތި، ކޮންމެވެސް ލިސްޓެއް، ދެން އިން ރިޒާވް ލިސްޓުގެ ހަތަރު ވަރަކަށް މީހުން އޭގައި ހިމެނިފައި އިން ވާހަކަ، އެ ރިޒާވް ލިސްޓަކީ އެއީ ކޮން ލިސްޓެއްތޯ؟،" ޔައުގޫބް އެއްސެވި އެވެ.
"އަޅުގަނޑަށް އެނގިފައި އޮތް ގޮތުގައި ރައީސް އޮފީހުގެ ގެޒެޓުކޮށްފައި އޮތް ރިޒާވް ލިސްޓެއް އެބަ އޮތް. ލިސްޓު އެ ތަރުބީތުންތޯ އެ ހަތަރު މީހުން ހިމެނިފައި އޮތް ވާހަކަ މިނިސްޓަރު އެ ދުވަހު ވިދާޅުވީ؟،" އޭނާ ވިދާޅުވި އެވެ.
އެ ސުވާލުގެ ޖަވާބުގައި އަސްލަމް ވިދާޅުވީ އެއީ ވެށިފަހީގެ ރިޒާވް ލިސްޓު ކަމަށެވެ. ނަމަވެސް ވާހަކަ ކުރިއަށް ނުގެންދެވެނީސް ރިޔާސަތުގައި އިންނެވި ނަޝީދު ވަނީ ވާހަކަ ހުއްޓުވާފަ އެވެ.
"ވެށިފަހި ޕްރޮގްރާމުގެ ރިޒާވް ލިސްޓުތޯ ނުވަތަ ބޯހިޔާވަހިކަމަށް އެންމެ ބޭނުންވާ މީހުންގެ ތެރެއިން ވަކި ގޮތެއް ހަމަނުޖެހިފައި ތިބި މީހުންގެ ލިސްޓުތޯ؟،" ނަޝީދު ސުވާލުކުރެއްވި އެވެ.
އެއީ ވެށިފަހީގެ ލިސްޓު ކަމަށް އަސްލަމް ވިދާޅުވުމުން، އެ މަޝްރޫއާ ގުޅޭ ގިނަ ވާހަކަތަކެއް ނަޝީދު ދެއްކެވި އެވެ.
ކޮންމެއަކަސް ނަޝީދު ފާހަގަކުރައްވާފައި އެ ވަނީ މުހިއްމު ނުކުތާތަކެކެވެ. ބޯހިޔާވަހިކަމަށް އެތައް ހާސް ބަޔަކު ޖެހި، ހާލުގައި އުޅެމުން ދާއިރު އެ ހައްގު އެންމެ ބޮޑަށް ބޭނުންވާ މީހުންގެ ލިސްޓެއް ނެތީ ކީއްވެގެން ހެއްޔެވެ؟ އެކަމަކީ އެންމެ އިސްކަމެއް ދީގެން ހިންގަން ޖެހޭ މަޝްރޫއު ނޫން ހެއްޔެވެ؟ 250 ގޯތި ދޭން ޖެހޭ މަޝްރޫއެއްގައި އެއް ބައި ދީގެން ފުއްދާލުމުން ބޯހިޔާވަހިކަމުގެ މައްސަލައަށް ލިބެން އޮތް ކުޑަ ލުޔަށް ވެސް ވާސިލް ނުވެވޭނެ އެވެ.
ނަޝީދުގެ ވާހަކަތާ ގުޅިގެން އަސްލަމް ވިދާޅުވީ މައްސަލައެއް އުޅޭ ނަމަ މަޖިލީހުން އެކަން ބެލުމަށެވެ.
"އެ ސުވާލުގައި އަޅުގަނޑު ފާހަގަކޮށްފިން އެއީ ވެށިފަހި މާލެ ޕްރޮގްރާމުގެ ލިސްޓޭ. އެންމެ ބޮޑަށް ގޯތި ގެދޮރު ބޭނުންވާ މީހުންގެ ގޮތުގައި އޮންނަ ލިސްޓެއް ނޫން އެއީކީއެއް. ދެން އެސެސްމަންޓާ ބެހޭ ގޮތުން އަޅުގަނޑު ނެތިން، އަޅުގަނޑުގެ މިނިސްޓްރީގެ މުވައްޒަފުން އެ މަސައްކަތް ކޮށްފައި ތިބީ،" އަސްލަމް ވިދާޅުވި އެވެ.
އަސްލަމްގެ އެ ވާހަކަތަކަށް ރައްދު ދެއްވަމުން ނަޝީދު ވަނީ މައްސަލައެއް އުޅޭ ކަމަށް ވާ ނަމަ އެކަމެއް މަޖިލީހުން ބަލާނެ ކަމުގެ ޔަގީން ކަން ދެއްވާފަ އެވެ. ނަމަވެސް މަޝްރޫއު ހިންގަން ޖެހޭ މިންވަރަން ނުހިންގަވާ ކަން ފާހަގަކޮށް ނަޝީދު ހިތްހަމަނުޖެހުން ފާޅުކުރެއްވި އެވެ.
