ސްޓްރީޓް ލައިބްރަރީ އަކީ އާއްމުން ބޭރަށް ނިކުމެ މައިޒާންތަކާއި ޕާކުތަކުގައި ތިބެގެން އެމީހުންގެ ހުސް ވަގުތުތައް ކުރުކޮށްލުމަށް އަދި ހާއްސަކޮށް ފޮތް ކިޔުމަށް ލޯބިކުރާ ފަރާތްތަކަަށް އެތަންތަނުގައި ތިބެގެން ފޮތް ކިޔާލުމުގެ ފުރުސަތު ދިނުމުގެ ގޮތުން ގާއިމް ކުރެވޭ ކުތުބުހާނާ ތަކެކެވެ.
ހެރިޓޭޖް މިނިސްޓްރީގެ ފަރާތުން ޑެޕިޔުޓީ މިނިސްޓަރު އަހްމަދު މުހުސިން ވަނީ ރާއްޖޭގައި ގާއިމްކުރާ ސްޓްރީޓް ލައިބްރަރީ އާ ބެހޭ މައުލޫމާތު ސީއެންއެމް އާ ހިއްސާކޮށްފައެވެ. އެގޮތުން މުހުސިން ވިދާޅުވީ ސްޓްރީޓް ލައިބްރަރީ ގެ ހިދުމަތް އަންނަ މަސް ތެރޭ މާލޭގެ ދެ ސަރަހައްދަކުން އާއްމުންނަށް ދެމުންދާނެ ކަމަށެވެ.
މާލޭގައި ގާއިމު ކުރާ ސްޓްރީޓް ލައިބްރަރީ ގާއިމް ކުރެވިގެންދާނީ މާލޭ ސަރަހައްދުގެ ކޮންމެވެސް އެއް ޕާކަކާއި ދާރުލްއާސާރު ކުރިމަތީ އޮންނަ މައިޒާންގައި ކަަމަށް މިނިސްޓްރީން މައުލޫމާތު ދެއެވެ. އެޔާއިއެކު އާއްމުންނަށް އެތަންތަނަށް ގޮސް ފޮތް ކިޔާލުމުގެ ފުރުސަތު ފަހިވެގެންދާނެ އެވެ. އޭގެއިތުރުން ހެރިޓޭޖް މިނިސްޓްރީން ދަނީ ރާއްޖޭގެ އެހެން ހިސާބުތަކުގައި ވެސް މިފަދަ ސްޓްރީޓް ލައިބްރަރީތައް ގާއިމުކުރުމަށް ވިސްނަމުންނެވެ.
ރާއްޖޭގައިވެސް ނިސްބަތުން ބޮޑު ބަޔަކީ ތަފާތު އެކި ފޮތްތައް ކިޔުމަށް ލޯބިކުރާ ބަޔަކަށް ވާއިރު ރާއްޖޭގައި ފުރަތަމަ ފަހަރަށް ގާއިމުކުރެވިގެންދާ ސްޓްރީޓް ލައިބްރަރީ އަކީ އާއްމުން ފޮތްތަކަށް ޝައުގުވެރިކުރުވާ ބޭރުގައި ހޭދަކުރާ ވަގުތުތަކުގައި ވެސް އަބަދުވެސް ކޮންމެ ވެސް އިލްމެއްގެ ތެރޭގައި އުޅެވޭ ކޮންމެވެސް އެއްޗެއް ދަސްކުރުމަށް ކޮށާދެވޭ މަގަކަށް ވާނެއެވެ.
ހަވީރުގެ ވަގުތުގައި އާއިލާއާއި އެކީ ހިތްހަމަ ޖައްސާލުމަށްޓަކައި ދާ ޕާކުތަކުގައިވެސް އާއްމުކޮށް ހުންނަނީ ކޮންމެވެސް ކުޅިވަރެއް ކުޅޭނެ ސާމާނެކެވެ. މި ގެންނަ ބަދަލާއެކު ޖިސްމާނީ ދުޅަހެޔޮކަމާއެކު ކުދިންގެ ނަފްސާނީ ދުޅަހެޔޮކަމަށް އެހީވެދޭނެ އެވެ. އެއީ މަޑުމައިތިރިކަމާއެކު ތިބެގެން ފޮތް ކިޔައި، އެހެން ކުދިންނާ އެންގޭޖުވެ، ވިސްނުން ހިންގާލުމުގެ ފުރުސަތު މީގެ ސަބަބުން ތަނަވަސްވާނެތީ އެވެ.
