ސައުދީގެ ޕްރެސް އޭޖެންސީން ވަނީ ސަލްމާން ރަސްގެފާނުގެ ހަށިކޮޅަށް ކޮވިޑް-19 ވެކްސިންގެ ފުރަތަމަ ޑޯޒް ޖައްސަވާ ވީޑިއޯއެއް އާންމުކޮށްފަ އެވެ.
އެގައުމުގެ ހެލްތު މިނިސްޓަރު ޑރ. ތައުފީގް ބިން ފައުޒާން އައްރާބިއާ ވަނީ ކޮވިޑް-19 އާ ދެކޮޅަށް ސައުދީން ކުރާ މަސައްކަތުގައި އެގައުމުގެ ރަސްގެފާނު ވެވަޑައިގެންފައިވާ އެހީތެރިކަން ފާހަގަކުރައްވައި އެމަނިކުފާނަށް ޝުކުރު އަދާކުރައްވައިފަ އެވެ.
ވޭތުވެދިޔަ 24 ގަޑިއިރުތެރޭ ސައުދީން 97 މީހަކަށް ކޮވިޑް ޖެހިފައިވާ އިރު، ހަތަރު މީހުން މަރުވެފައިވެ އެވެ. އެހެންކަމުން އިއްޔެ އަކީ އެގައުމުން ކޮވިޑް-19 ޖެހިގެން މަރުވި މީހުންގެ އަދަދު އެންމެ މަދުން ރެކޯޑް ކުރެވުނު ދުވަހެވެ.
މިހާތަނަށް ސައުދީން 364،000 އަށް ވުރެ ގިނަ މީހުންނަށް ކޮވިޑް-19 ޖެހިފައިވާ އިރު، 6،200 އަށް ވުރެ ގިނަ މީހުން އެގައުމުން މަރުވެފައިވެ އެވެ. ސައުދީ ހިމެނެނީ ކޮވިޑް-19 ކޮންޓްރޯލް ކުރެވުނު މަދު ގައުމުތަކުގެ ތެރޭގަ އެވެ.
