ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން ކަނޑުގެ މާހައުލުގައި އުޅޭ މަޑީގެ ހުރިހާ ބާވަތެއް ހިމާޔަތްކޮށްފައި ވަނީ ޖޫން 16، 2014 ގައެވެ.
އީޕީއޭއިން މިއަދު ނެރުނު ބަޔާނެއްގައި ބުނީ މިހާރަކަށް އައިސް ކަނޑު އުޅަނދުތަކުން އަޅާ ވަލުގައި ތާށިވެ، މަޑީގެ ބާވަތެއް ކަމަށްވާ އެންމަޑި މަރުވުން އިތުރުވެފައިވާ ކަމަށެވެ.
އީޕީއޭއިން އިތުރަށް ބުނީ އެންމަޑި، ވައިފިޔަމަޑި އަދި މަޑީގެ ބާވަތްތަކަކީ ރާއްޖެއަށް ތިމާވެށީގެ ގޮތުންނާއި އިގްތިސާދީ ގޮތުން މުހިއްމު ދިރުންތަކެއް ކަމަށެވެ.
ވަލެއްގައި ތާށިވެ، އެންމަޑިއެއް މަރުވެފައި-- ފޮޓޯ: މަންޓާ ރޭ ޓްރަސްޓް
ރާއްޖެއިން ފެންނަ އެންމަޑީގެ ދެ ބާވަތް ވެސް ވަނީ އިންޓަނޭޝަނަލް ޔޫނިއަން ފޯ ކޮންޒަވޭޝަން އޮފް ނޭޗާ (އައިޔޫސީއެން) ގެ ރެޑްލިސްޓުގައި ހިމަނާފަ އެވެ.
ރެޑްލިސްޓުގައި "ވަލްނަރަބަލް" ދިރުމެއްގެ ގޮތުގައި އެންމަޑި ހިމަނާފައި ވަނީ އެ ތަކެތި ދުނިޔެއިން ނެތިދޔުމުގެ ބިރު ބޮޑުވެފައި ވާތީ އެވެ.
