މޮސްޓާ މިހެން ވިދާޅުވީ، އެމްޑީޕީގެ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް މަޖިލީހަށް މިއަދު ހުށަހަޅުއްވާފައިވާ ގަރާރުގެ ބަހުސްގައި ވާހަކަ ދައްކަވަމުންނެވެ. އެ ގަރާރަކީ މާލޭގައި ޒުވާނުންނަށް ފަސޭހަކަމާއިއެކު މިއުޒިކް އަޑުއަހާލާ އެކުވެރިންނާއި ބައްދަލުކޮށްލައި، ހާސްކަމުން ބޭރުގައި އުފާވެރި މާހައުލެއްގައި ހީ ސަމާސާކޮށް މަޖާކޮށްލާ އެއްވެ ތިބެވޭނެ ފަދަ މަރުކަޒެއް ގާއިމްކޮށްދިނުމަށް ސަރުކާރަށް ގޮވާލައި ހުށަހަޅާފައިވާ ގަރާރެކެވެ.
ގަރާރުގެ ބަހުސްގައި ވާހަކަ ދައްކަވަމުން މޮސްޓާ ވިދާޅުވީ، ބޮޑަށް ފާހަގަކުރެވެނީ، އެމްޑީއެން އާއި އުތެމާއިން މީގެ ކުރިން، މިނިވަންކަން ނެތް ކަމަށް ބުނެ ނެރުނު ރިޕޯޓުތައް ތަންފީޒުކުރުމުގެ މަސައްކަތްތައް ފެށިގެންދަނީ މަޖިލީހުގެ ތެރެއިން ކަމަށެވެ. އެގޮތުން މިއުޒިކަކީ ރާއްޖޭގެ 90 އަށް ވުރެ ގިނަ އިލްމުވެރިން ހިލާފު އުފެދިފައިވާ ކަމެއް ކަމަށާއި، ހަސަން ލަތީފް ހުށަހެޅުއްވި ގަރާރަކީ އެފަދަ ކަމެއް ހުއްދަކޮށް ގައުމު ފަސާދަ ކުރުމަށް ހުށަހަޅުއްވާފައިވާ ގަރާރެއް ކަމަށެވެ.
މީގެ އިތުރުން މޮސްޓާ ވަނީ، ސަލްމާން މިސްކިތް ނުހުޅުވި ލަސްވެގެންދާ މައްސަލައަށް އަލިއަޅުއްވާލައްވާފައެވެ. އެގޮތުން މިސްކިތެއްގެ ގޮތުގައި އެތަން ބޭނުން ނުކޮށް ބަހައްޓާފައި އެ ހުރީ އެތަނަކީ "ތެޔޮބިޑި ބޮއެ، ރާބޮއެ މަޖާކުރާނެ" ތަނަކަށް ހަދަން ކަމަށް ތުހުމަތު ކުރައްވާފައެވެ.
މޮސްޓާ ވިދަޅުވީ، ހަމަ ޔަގީނުންވެސް ޒުވާނުން ބޯހާސްކަން ފިލުވާލަން ދާނެ ތަންތަން މާލޭގައި މަދެއް ނުވާނެ ކަމަށާއި، އަށާވީހަކަށް މިސްކިތް މާލޭގައި އެބަހުރި ކަމަށެވެ. އަދި ބަރާބަރަށް އެ މިސްކިތްތަކުގައި ދަރުސްތައް ދެމުންދާ ކަމަށާއި، އެ ދަރުސްތައް އަޑުއަހައިގެން ޒުވާނުންގެ ހާސްކަން ފިލާނެ ކަމަށް މޮސްޓާ ވިދާޅުވިއެވެ.
މޮސްޓާ ވިދާޅުވީ މި ގަރާރަކީ ދިވެހި ޒުވާނުން އަދަށްވުރެ ބޮޑަށް ހަލާކުކޮށްލައި، އެމީހުންނަކީ ދައުލަތަށް ބަރޯސާވެފައި ތިބޭ ބޭކާރު ބަޔަކަށް ހަދައި، މަސްތީ ދުނިޔެއެއްގައި ތިބޭ ބަޔަކަށް ހެދުމުގެ ބޭނުމުގައި ހުށަހަޅާފައިވާ ގަރާރެއް ކަމަށެވެ. އެގޮތުން އެމްޑީޕީއަކީ އަބަދުވެސް ޒުވާނުން ހަލާކުކުރާ ބައެއް ކަމަށާއި، އެޕާޓީގެ ރައީސަކީ މަސްތުވާތަކެތިން ޒުވާނުން އުފާހޯދަން ވިދާޅުވީ ބޭފުޅެއް ކަމަށް މޮސްޓާ ވިދާޅުވިއެވެ.
