ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއެކުރައްވައި މިއަދު ގެޒެޓުކޮށްފައިވާ އެންގުމުގައި ވަނީ، އައްޑޫގައި ކޮވިޑް ކޮންޓްރޯލް ކުރުމަށް، މިމަހުގެ 9 ވަނަ ދުވަހު އަންގާފައިވާ އެންގުމުގައި 1 ހަފްތާގެ މުއްދަތައް އެޅުމަށް އަންގާފައިވާ ފިޔަވަޅުތައް އިތުރު 1 ހަފްތާއަށް ދަމަހައްޓަން ނިންމާފައިވާ ކަމަށެވެ.
އައްޑޫސިޓީގައި ކޮވިޑްގެ ކޭސްތައް ފެނި ރައްކާތެރިކަމުގެ ފިޔަވަޅުތައް އެޅުމުގެ ގޮތުން ކާފިއު ހިންގަން ނިންމާފައިވަނީ މިމަހުގެ 9 ވަނަ ދުވަހުއެވެ. އެގޮތުން އައްޑޫސިޓީގައި ރޭގަނޑު 08:00 އިން ފެށިގެން ފަތިހު 04:00 އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުތުން މަނާކުރުމުގެ އިތުރަށް، ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ވަނީ މަނާކޮށްފައެވެ. އަދި މީގެއިތުރުންވެސް ރައްކާތެރިކަމުގެ އިތުރު ފިޔަވަޅުތަކެއް ވަނީ އަޅާފައެވެ.
އެގޮތުން، ސިޓީގެ އެއް ރަށުން އަނެއް ރަށަށް ދަތުރުކުރުމާއި އެއް ގެއިން އަނެއް ގެއަށް ޒިޔާރަތް ކުރުން ހުއްޓައިލުމަށާއި، އެއްފަހަރާ 3 މީހުންނަށްވުރެ ގިނަމީހުން އެއްވެ އުޅުން ހުއްޓައިލުމަށާއި، ސެލޫންތަކާއި، ޖިމްތައް ބަންދުކުރުމަށާއި، ކުޅިވަރާއި ކަސްރަތުގެ ހަރަކާތްތައް ހުއްޓައިލުމަށާއި، ފިރާތަކާއި ބޭންކުތައް ފަދަ އާންމު ހިދުމަތް ދޭ ތަންތަނުގައި ހިދުމަތް ދޭއިރު ހެލްތު ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ގައިދުރުމިން ބެހެއްޓުމާއި، ތަނަށް ވަދެވޭ އަދަދު ކަނޑައެޅުމާއި، ރައްކައުތެރިކަމުގެ އެހެނިހެން ފިޔަވަޅުތައް އަޅައިގެން ހިދުމަތް ދިނުމަށާއި، ޔުނިވަރސިޓީތަކާއި، ކޮލެޖްތަކާއި، ސްކޫލުތަކަށް ދަރިވަރުން ހާޒިރުވެގެން ކްލާސްތައް ކުރިޔަށް ގެންދިޔުން ހުއްޓައިލުމަށާއި، ހޮޓާތަކާއި، ކެފޭތަކާއި، ރެސްޓޯރަންޓްތަކުން ދެމުންގެންދާ ހިދުމަތްތައް ހުއްޓައިލުމަށް ވަނީ އަންގާފައެވެ.
