ރާއްޖޭގެ އޮންލައިން ނޫހެއްގައި ޓެރަރިސްޓް ޖަމާއަތަކަށް ނިސްބަތްވާ މީހަކަށް މިނިސްޓަރު ނަހުލާ ހަރަދުކުރެއްވި ކަމަށް ބުނެ ބޮޑެތި ތުހުމަތުތަކެއް ކޮށްފައިވަނިކޮށް އެކަން މިނިސްޓަރު ވަނީ "ސީއެންއެމް"އަށް ދޮގު ކުރައްވާފަ އެވެ.
މިނިސްޓަރު ނަހުލާ ވިދާޅުވީ ޓެރަރިޒަމާ ގުޅުވައިގެން ދައްކަމުން އަންނަ ވާހަކަތަކަކީ އެއްވެސް އަސާސެއް ނެތް ވާހަކަތަކެއް ކަމަށާއި އެ ވާހަކަތައް އެކަމަނާ އެއްސެވީ ވެސް އަލަށް ކަމަށެވެ.
އަދި އެފަދަ ވާހަކަތައް ފަތުރަނީ ބަޔަކު އަޑީގައި ތިބިގެން ގާނޫނާ ހިލާފަށް ހާސިލްކުރަން ބޭނުންވާ ކަންތައްތައް ހާސިލް ނުވުމުން އެކަމުގެ ހަސަދަވެރިކަން އޮވެގެން ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އެކަމަކީ އެކަމަނާގެ އަބުރުކަތިލުމުގެ ނިޔަތުގައި ކުރަަމުންދާ ކަމެއް ކަމަށެވެ.
އޭގެ އިތުރުން މިނިސްޓަރު ވަނީ ޓެރަރިޒަމާ ގުޅޭ އެއްވެސް ކަމެއް މިނިސްޓަރު ކުރީގައިވެސް، މިހާރުވެސް އަދި ކުރިއަށްއޮތްތަނުގައި ވެސް ނުކުރުއްވާނެ ކަމަށް ވިދާޅުވެފަ އެވެ.
އަދި ހަގީގަތާ ހިލާފު ވާހަކަތައް ނޫސްތަކުގައި ރިޕޯޓް ނުކުރުމަށްވެސް މިނިސްޓަރު އިލްތިމާސްކުރެއްވި އެވެ.
