މި ޝޯގެ ތެރެއިން ޔޫސޭ ވަނީ އޭނަގެ ކޮމީޑިއަން ހަޔާތުގައި ހޭދަވި 40 އަހަރުތެރޭ ހޯދިފައިވާ ކާމިޔާބީއާއި ތަޖުރިބާގެ އިތުރުން، އަމިއްލަ ދިރިއުޅުމުގެ ގިނަ ވާހަކަތަކެއްވެސް ހިއްސާކޮށްފައެެވެ. މިޝޯގައި ޔޫސޭގެ ދޮށީ އަންހެން ދަރިފުޅު މުސްލިހާ ޔޫސްޕް ވަނީ އޭނަ ބައްޕައާއިމެދު ދެކޭގޮތް ހިއްސާކޮށްފައެވެ.
މުސްލިހާ ބުނީ، މުނިފޫހިފިލުވުމުގެ ދާއިރާގައި ބައްޕަ އެހާ ގިނަ ދުވަހު މަސައްކަތްކުރެއްވުމުން ވަރަށް އުފާވެ، ފަހުރުވެރިވާ ކަމަށެވެ. ސަބަބަކީ ބައްޕައަކީ އެންމެ ފުރަތަމަ ދިވެހިން ހެއްވާލި މީހާކަމަށް ގަބޫލުކުރާތީ ކަމަށާއި އޭނަވެސް ހަނދާން ހުންނަން ފެށީންސުރެ ކޮންމެ ރޯދަމަހެއްގައިވެސް "ދިރިއުޅުމަކީ މިއީ ބާ؟" އަންނާނެ ވަގުތަކަށް އަބަދުވެސް އިންތިޒާރުކުރެވޭ ކަމަށް މުސްލިހާ ބުނެއެވެ.
މުސްލިހާ ބުނީ، ބައްޕަ އޭރު ޓީވީން ފެންނަ ވަގުތަކީ ވަރަށް ހިތަަށް އުފާވެރިކަން ގެނެސްދޭ ވަގުތުކޮޅެއްކަމަށެވެ. އެއީ ކުޑައިރު އޭނައަށް ބައްޕަ ގިނައިން ފެންނަނީ ޓީވީން ވީމަ ކަމަށް މުސްލިހާ ބުނެއެވެ. މުސްލިހާ އޭނަގެ ބައްޕަ ސިފަކުރަނީ އޭނައާއި ގައުމުގެވެސް ހީރޯއެއްގެ ގޮތަށެވެ. މުސްލިހާ ބުނީ އެކަން ބައްޕަ ވަނީ 1988 ވަނަ އަހަރުގެ ނުވެމްބަރު ތިން ވަނަ ދުވަހު ސާބިތުވެސް ކޮށްދީފަ ކަމަށެވެ. އެވާހަކަތައް މުސްލިހާގެ ކުދިންނަށް އަދި ބައްޕަގެ ކާފަ ދަރިންނަށް ކިޔާދެނީ ފަހުރުވެރި ކަމާއިއެކުވެ. އެހެންކަމުން އެކުދިންގެ ކުރިމަތީގައި ވެސް މުސްލިހާގެ ބައްޕަ ވެފައިވަނީ ހީރޯއަކަށެވެ.
މުސްލިހާ ބުނީ އޭނަގެ އަބަދުގެ ވެސް އެދުމަކީ ބައްޕައަށް ކުރިއެރުމާއި ކާމިޔާބީ އިތުރަށް ދެއްވުން ކަމަށާއި ފުރިހަމަ ސިއްހަތެއްގައި އުފަލުގަ ލެހެއްޓެވުން ކަމަށެވެ. ބައްޕަދެކެ ވަރަށް ލޯބިވާކަން ފާހަގަކުރަމުން މުސްލިހާ ވަނީ އޭނަގެ ބައްޕައަކީ އޭނަގެ "ކިންގް" ކަމަށާއި ބައްޕަ ވަރުގެ ކޮމީޑިއަންއެއްވެސް އަދި އެކްޓަރެއް ވެސް ރާއްޖޭގައި ނުހުންނާނެކަމަށް ބުނެފައެވެ.
މުސްލިހާ ބައްޕައާއި މެދު ދެކޭ ގޮތް ބަންޑުންކޮށްލި އެ ވީޑިއޯކޮޅު ނިމުނުއިރު ޔޫސޭ ވަނީ ފެންކަޅިވެފައެވެ. އަދި ބުނާނެ އެއްޗެއްވެސް ނޭގި ޔޫސޭއަށް ވަނީ ރޮވިފައެވެ.
މުސްލިހާ އަކީ ޔޫސޭގެ ފުރަތަަމަ ކައިވެންޏަށް ލިބިފައިވާ އެންމެ ދޮށީ ދަރިއެވެ. ފަހުން ފިލްމީ ތަރި ޝަކީލާއާއި ކައިވެނީގެ ގޮތުން ގުޅި އެ ކައިވެންޏަށްވެސް ޔޫސޭއަށް ވަނީ ދެ އަންހެން ދަރިން ލިބިފައެވެ.