އައިޖީއެމްއެޗްގައި ދުވަސް ނުފުރާ ވިހެއި ކުއްޖަކަށް އަޅައި ނުލާ މަރުވާން ދޫކޮށްލާފައިވާ ކަމަށް އާއިލާއިން ބުނާއިރު، ޒައިދު ކުރެއްވި ޓްވީޓެއްގައި، ވަނީ އުންމީދު ކެނޑިފައިވާ ހާލުގައި ވިޔަސް، ވައިބަލް ބޭބީއެއް ވިޔަސް ނުވިޔަސް، ވިހާވެސް ބޮޑަށް ހެޔޮކޮށް އަމަލު ކުރުމަށް ގޮވާލާފައެވެ.
އިތުރަށް ވިދާޅުވީ ފުރާނަ އެޅުވޭނީ 120 ދުވަސް ފަހުން ކަމަށާއި، އޭގެ ކުރިން ބައިގެން ގޮސްފި ނަމަ ވަކި ކަންތައްތަކެއް ކުރުމަށް ނުވާ ކަމަށެވެ. އަދި 5 ވަނަ މަހުގައި ނުވަތަ އޭގެ ފަހުން ބައިގެން ގޮސްފި ނަމަ ހިނަވާ ކަފުންކޮށް ކަށުނަމާދު ކުރަން ޖެހޭނެ ކަމަށް އޭނާ ވަނީ ބުނެފަ އެވެ.
ޝެއިހް ޒައިދު މިހެން ބުނެފައިވާއިރު އައިޖީއެމްއެޗުން މި މައްސަލައިގައި ބުނެފައި މާބަނޑު މީހެއްގެ ބަނޑަށް 22 ހަފްތާ (154 ދުވަސް) ގެ ކުރިން ބަނޑުގައިވާ ދަރިފުޅު މަރުވެއްޖެނަމަ ނުވަތަ ވިހައިފިނަމަ އެހާލަތުގައި ހޮސްޕިޓަލުން ބަލާނީ ދަރިފުޅު ބައިގެން ދިޔައީ ކަމަށެވެ.
އައިޖީއެމްއެޗްގައި ދުވަސް ނުފުރާ ވިހެއި ކުއްޖާއަށް ފަރުވާ ނުދީ މަރުވާން ދޫކޮށްލާފައިވާ ކަމަށް ބުނާ މައްސަލަ ފެންމަތިވެފައިވާއިރު އައިޖީއެމްއެޗުން ބުނީ މިހާރު އެ މައްސަލަ ބަލަމުންދާ ކަމަށެވެ.
