ދިވެހިންގެ ބަރަހަނާ މަންޒަރު ހިމެނޭ ފޮޓޯ އާއި ވީޑިއޯ ޓެލެގްރާމްގައި އާއްމު ކުރަމުން ގެންދިޔަ ދެ ގްރޫޕެއް ޓެލެގްރާމް އިން ފޮހެލިތާ 5 މަހެއްހާ ދުވަސް ފަހުން އަނެއްކާ ވެސް އިތުރު ގްރޫޕެއް ހަދައިގެން ދިވެހިންގެ ބަރަހަނާ މަންޒަރު ހިމެނޭ ފޮޓޯ އާއި ވީޑިއޯ އާއްމުކޮށް އަންހެނުން ލައްވާ ހަށިވިއްކުމާއި ނަމާއި ނަންބަރު ހާމަކުރާ ކަމަށް މައުލޫމާތު ވަނީ ލިބިފައެވެ.
މީގެ ކުރިން މިފަދަ ގްރޫޕްތަކެއް ޓެލެގްރާމް އިން ބޭން ކުރީ އެއީ ޓެލެގްރާމް އެޕްލިކޭސަން ބޭނުން ކުރުމުގެ ގަވައިދާއި ހިލާފަށް ހިންގަމުން ގެންދިޔަ ގްރޫޕްތަކެއް ކަމަށް ވާތީއެވެ.
ބަރަހަނާ މަންޒަރު ފެތުރުމާއި، އެފަދަ މަންޒަރު އުފެއްދުމަކީ ރާއްޖޭގެ ގާނޫނު އުގޫބާތުގެ ދަށުން އަދަބު ކަނޑައެޅިފައިވާ ޖިނާއީ ކުށެކެވެެ.
ސީއެންއެމް އަށް މައުލޫމާތު ދިން ބައެއް މީހުން ބުނާ ގޮތުގައި ދިވެހިންގެ ބަރަހަނާ މަންޒަރުތައް އާއްމު ކުރަމުން ގެންދިޔަ ދެ ގްރޫޕެއް މީގެ ކުރިން ޓެލެގްރާމް އިން ވަނީ ބޭން ކޮށްފައެވެ.
މިހާރު އަންހެނުން ލައްވާ ހަށިވިއްކުމުގެ މަސައްކަތް ކުރުވާ ގްރޫޕެއް ހެދިފައިވާ އިރު މި ގުރޫޕްތަކުގައި ތަފާތު އަންހެނުންގެ ނަންބަރުތައް ވެސް އަންނަނީ މި ގުރޫޕުތަކަށް އަޅަމުންނެވެ.
މި ގްރޫޕްތައް ހިންގާ، އަދި އެތައް ބައެއްގެ ބަރަހަނާ ފޮޓޯ އާއި ވީޑިއޯ އާއްމު ކުރަމުން ގެންދާކަން ފުލުހުންގެ ސަމާލުކަމަށް ވެސް އޮތީ އައިސްފައެވެ.
ދުނިޔޭގެ ބައެއް އެހެން ގައުމުތަކުގައި ވެސް ޓެލެގްރާމް ގްރޫޕްތަކުގައި ބަރަހަނާ ފޮޓޯ އާއްމު ކުރާ މައްސަލަ ފެންމަތިވެފައިވެއެވެ. އިސްރާއީލްގައި ވެސް މިއަހަރު ތެރޭގައި ވަނީ މިފަދަ މައްސަލައެއްގައި މީހަކުގެ މައްޗަށް ޖަލު ހުކުމެއް އިއްވާފައެވެ. އަދި އަވައްޓެރި އިންޑިއާގައި ވެސް މިފަދަ މައްސަލައެއްގައި މީހަކު ހައްޔަރުކޮށް ތަހްގީގް ކުރިއަށް އެބަގެންދެއެވެ.
މިފަދަ ގޮތެއްގައި ރާއްޖޭގައިވެސް މިފަދަ މައްސަލަ ސީރިއަސް މައްސަލަ އެއްކަމަށް ދެކި ބަލާއި ފިޔަވަޅު އެޅޭ ނަމަ އަންހެނުންގެ އިއްޒަތް ވެއްޔާ މޮޑެވުމުން ސަލާމަތް ވެގެން ދާނެއެވެ.
