ބޮލީވުޑްގެ މަޝްހޫރު ލަވަކިޔުންތެރިޔާ ނެހާ ކައްކާރު ދާދި ފަހުން މީޑިއާއަކަށް ދިން އިންޓަވިއުއްގަ ބުނީ ފިލްމުތަކަށް ކިޔާދިން ލަވައެއް ކިތަންމެ ހިޓް ވިޔަސް އެޔަކުން އެމީހުންނަށް ލިބޭ ފައިސާއެއް ނޯންނަ ކަމަށެވެ.
ނެހާ ބުނީ ބައެއް މީހުންނަށް ހީވެފައޮންނަނީ އެމީހުން އެހާ ގިނަ މަޝްހޫރު ލަވަތައް އެއް އަހަރެއްގެ ތެރޭގައި ކިޔުމުން އެމީހުންނަށް ވަރަށް ބައިވަރު ފައިސާ ލިބޭކަމަށެވެ. ނަމަވެސް އެއާ ހިލާފަށް އެމީހުންނަށް ފައިސާ ލިބެނީ ލައިވް ޝޯތައް ނެގި ވަރަކަށް ކަމަށް ނެހާ ވަނީ ބުނެފައެވެ.
"އޯ ސާކީ"، "ކާލާ ޗަޝްމާ" އަދި "ގަރްމީ" ފަދަ ސުޕާ ހިޓް ލަވަތައް ގެނެސްދީފަވާ ނެހާ ބުނީ ލައިވް އިވެންޓްތަކުން އެމީހުންނަށް ރަނގަޅު އާންމުދަނީއެއް ލިބޭ ކަމަށެވެ.
ނެހާ މިއުޒިކް އިންޑަސްޓްރީއަށް ތައާރަފްވީ ރެއަލިޓީ ޝޯ އިންޑިއަން އައިޑޮލް 2 އިންނެވެ. އެއަށް ފަހު ޖޯ ޖީތާ ވޮހީ ސުޕާ ސްޓާގެ ސީޒަން އެކަކުން ވެސް ނެހާ ފެނިގެންދިޔައެވެ.
ނެހާ ވަނީ އިންޑިއަން އައިޑޮލްގެ ޖަޖެއްގެ ގޮތުގައިވެސް ފެނިގެންގޮސްފައެވެ.
