އެމްޑީޕީން ބަރުލަމާނީ ނިޒާމަށް ތާއީދުކުރައްވާ ސަބަބާއި ބެހޭގޮތުން ޓީވީ ޕްރޮގްރާމެއްގައި ވާހަކަދައްކަވަމުން އެމްޑީޕީގެ އިސް ސަފުގައިވެސް ހަރަކާތްތެެރިވެފައިވާ މޫސާ ވިދާޅުވީ، އެމްޑީޕީއަކީ އެއްވެސް އިރެއްގައި ބަރުލަމާނީ ނިޒާމަކަށް ތާއީދުކުރާ ޕާޓީއެއް ނޫން ކަމަށާއި އެ ޕާޓީން ފެށުނީންސުރެ މަސައްކަތްކުރީ އެ ނިޒާމުގެ ސިފަތައް ނައްތާލަން ކަމަށެވެ.
ކުރީގެ ރައީސް މައުމޫންގެ ދައުރުގައި ރާއްޖޭގައި އޮތީ ބަރުލަމާނީ ނިޒާމެއްކަން ފާހަގަކުރައްވަމުން މޫސާ ވިދާޅުވީ، އޭރު ރާއްޖޭގެ ހުރިހާ ފަޑިޔާރުންނާއި މިނިސްޓްރީ ލެވެލްގެ ބޭފުޅުންގެ އިތުރުން ރައީސުލްޖުމުހުރިއްޔާ އައްޔަންކުރައްވާ މެންބަރުންވެސް ތިއްބަވަނީ ރައްޔިތުންގެ މަޖިލީހުގައި ކަމަށެވެ.
މޫސާ ވިދާޅުވީ ވޭތުވެދިޔަ މާޒީ ރައްޔިތުންނަށް އޮޅުވާލާ، ކޮންމެ މީހަކު ވެރިކަމުގެ ބާރުތަކަށް އަންނަންވުމުން ނިޒާމު ބަދަލުނުކުރިޔަސް ރާއްޖޭގައި މިއޮތީ އުސޫލެއް ގެނެސްފައި ކަމަށެވެ. އޭރު އެމްޑީޕީން އަޑުއުފުލީ ބާރުތައް ވަކިކުރެވިގެން ވާ ނިޒާމަކަށް ވެރިކަން ކުރަން ބޭނުންވާ ކަމަށް ކަން ފާހަގަކުރައްވާ މޫސާ ވިދާޅުވީ، ނިޒާމީ ވޯޓުނަގަންޖެހުނީ އެކަމުގެ ތެރެއިން ކަމަށެވެ.
އޭރު ރައީސް މައުމޫން އެންމެ ފުރަތަމަ ތާއީދުކުރެއްވީ ބަރުލަމާނީ ނިޒާމަށް ކަމަށާއި، އެހެންނަމަވެސް ފަހުން ރައްޔިތުންގެ މަޖިލީހުގެ ހާއްސަ މެންބަރުންނާއި ރައީސް އޮފީހުގައި ބައްދަލުކުރެއްވުމަށްފަހު ސަރުކާރުން ތާއީދުކުރަނީ ރިޔާސީ ނިޒާމަކަށް ކަމަށް އެންގި ކަމަށް މޫސާ ވިދާޅުވިއެވެ.
އެހެންކަމުން އެފަހަރު އޮތް ނިޒާމީ ވޯޓުގައި އެމްޑީޕީން ބަރުލަމާނީ ނިޒާމްކޮޅު ނަގާ އެނިޒާމަށް ތާއީދުކުރާކަން ދެއްކީ އޭރު ރާއްޖޭގައި އެމްޑީޕީއަށް އޮތް ތާއީދު ދެނެގަތުމަށް ކަމަށް މޫސާ ވިދާޅުވިއެވެ.
ދެހާސް ހަތްވަނަ އަހަރު އޮތް ނިޒާމު ކަނޑައެޅުމަށް ބޭއްވި ފެންނަ ނުފެންނަ ވޯޓުގައި އެމްޑީޕީން ބަރުލަމާނީ ނިޒާމަކަށް ތާއީދުކުރީ ފާޓީއަށްއޮތް ތާއީދު ބެލުމަށްކަމަށް މޫސާ ވިދާޅުވިއިރު، އެއަހަރުގެ އިންތިހާބުގައި ރައްޔިތުންގެ ތެރެއިން ބޮޑު އިންސައްތައެއް ނިންމާފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމެއް ކަމަށެވެ.
އަދި އެމްޑީޕީއަކީ އެއްވެސް އިރެއްގައި ބަރުލަމާނީ ނިޒާމަކަށް ތާއީދުކުރާ ޕާޓީއެއް ނޫން ކަމަށާއި އެ ޕާޓީން ފެށުނީންސުރެ މަސައްކަތްކުރީ އެ ނިޒާމުގެ ސިފަތައް ނައްތާލަން ކަމަށް މޫސާ ވިދާޅުވިއިރު، ބަރުލަމާނީ ނިޒާމް ގެނައުމަށް ފެށުނީއްސުރެ ނަޝީދު އަންނީ ވަކާލާތު ކުރަމުންނެވެ. ނަޝީދު ވިދާޅުވަނީ ރާއްޖޭގަ އޮންނަން އެންމެ ކަމުދާ ނިޒާމަކީ ބަރުލަމާނީ ނިޒާމް ކަމަށެވެ.