ތުރުކީގެ ހެލްތު މިނިސްޓްރީއިން ރިޕޯޓު ކުރާ ގޮތުގައި ފާއިތުވެދިޔަ 24 ގަޑިއިރު ތެރޭގައި ތުރުކީއިން ވަނީ 37،312 އާ ކޮވިޑް-19 ޕޮޒިޓިވް ކޭސްތަކާއި 353 މަރު ރެކޯޑު ކުރެވިފައެވެ. ތުރުކީއަކީ މުޅި ދުނިޔޭގައިވެސް ހަތަރު ވަނައަށް އެންމެ ކޭސްތައް ގިނަ ގައުމެވެ.

ހޯމަ ދުވަހުގައި ކެބިނެޓް ބައްދަލުވުމެއްގައި ވާހަކަފުޅު ދައްކަވަމުން ރައީސް އެރްދޯގަން ވަނީ ސިޓީއެއްގެ ތެރޭގައި ދަތުރު ކުރާއިރު ފުލުހުންގެ ހުއްދަ ބޭނުންވާނެ ކަމަށާއި، ސްކޫލްތަކަށް ބަންދުކޮށް އޮންލައިން ކޮށް ތައުލީމް ހާސިލްކުރެވޭނެކަމަށާއި، އަދި ދަތުރުފަތުރު ކުރެވޭނީވެސް ވަކި ހައްދެއްގެ ދަށުން ކަމަށެވެ.

އަދި ޒަރޫރީ ބޭނުންތަކާއި، ބޭސްފަރުވާއަށް ފިޔަވައި އެހެނިހެން އެއްވެސް ސަބަބަކާހުރެ ތުރުކީގެ ރައްޔިތުންނަކަށް ގެއިން ބޭރަށް ނުނިކުމެވޭނެ ވާހަކަވެސް ރައީސް ވަނީ އަންގަވާފައެވެ.

އެހެންނަމަވެސް ކާބޯ ތަކެތި އުފައްދާ ކުންފުނި ތަކުންނާއި އެމެޖެންސީ ހިދުމަތުގެ މުވައްޒަފުންނަށް ބޭރުގައި އުޅުމުގެ ފުރުސަތު އޮތްކަމަށްވެސް ރައީސް ވިދާޅުވިއެވެ.