އެހެންނަމަވެސް އެޔަށްފަހު ދެން ދައްކަވަން ފެއްޓެވީ ނ. އަތޮޅުގެ ރަށެއްގައި ގެއެއް އެޅުމަށް މީހަކު އުޅޭގޮތުގެ ވާހަކައެެވެ. އެއީ މީގެ 12 އަހަރު ކުރީގެ ހަނދާންތަކެއް ނަމަވެސް އެ ހަނދާންތައް އެމަނިކުފާނު އާކުރަމުން ބުނެދެއްވަން މަސައްކަތްކުރައްވަނީ އަތޮޅުތެރޭގެ ރައްޔިތުން އުފާވެރި ދިރިއުޅުމެއް ބިނާކުރުމަށް އުޅޭ ހާލެވެ.
ނަޝީދު ވިދާޅުވީ ގިނަ ޕާޓީ އެކުލެވޭ ނިޒާމާއި، ހިޔާލު ފާޅުކުރުމުގެ މިނިވަންކަމާއި، އިންސާނީ ހައްގުތަކާއި، އަދި ބާރުތައް ވަކިކުރެވި ސިޔާސީ ހަަރަކާތް ސުލުހަވެރިކަމާއި އެކުގައި ހިންގަން ފެށުމުން ގައުމުތައް ކުރިއަަށްދާކަމަށެވެ. އެ ގައުމުތައް ކުރިއަށް "ޖަންޕު" ޖަހާކަން ފާހަގަކުރަމުން ރައީސް ނަޝީދު ވިދާޅުވީ އެހެންނަމަވެސް މިއަދު ކުރަން މިޖެހޭ ސުވާލަކީ "ކީއްހޭ މިވީ؟" ކަމަށެވެ. އެހުރިހާ ބާރުތަކެއް ލިބި ގިނަ ޕާޓީ އެކުލެވޭ ނިޒާމެއްގެ ތެރެއިން ވެސް އެކަން އެގޮތަށް ނުވާން މި ސަރުކާރަށް ނުވަތަ ރާއްޖެއަށް ދިމާވެގެން މިއުޅޭ މައްސަލައަކީ ކޮބާތޯ ރައީސް ނަޝީދު ސުވާލު އުފެއްދެވިއެވެ.
ރައީސް ނަޝީދު އެ އިޝާރާތްކުރައްވަނީ އެމްޑީޕީން އަބަދުވެސް ވަކާލާތުކުރަމުން އަންނަ ލާމަރުކަޒީ ނިޒާމަށްހެން ހީވެއެވެ. މި ނިޒާމުގެ ތެރެއިން ކައުންސިލްތައް ބާރުވެރިކުރުވުމަށް އެކަށީގެންވާ ބާރުމިނެއް ނުގެނެވޭ ވާހަަކަހެން ހީވެއެވެ.
ރައީސް ނަޝީދު 2008 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހު ވެރިކަމާއި ހަވާލުވެވަޑައިގެންނެވީ ރާއްޖޭގެ ހިންގުން ލާމަރުކަޒީ އުސޫލުން ހިންގުމަށް މަގުފަހިވާގޮތަށް ލިޔެވިފައި އޮތް ގާނޫނު އަސާސީއަކާއިއެކުގައެވެ. އެއާއިއެކު، ކުރީގެ ކަތީބުންނާއި އަތޮޅުވެރިންގެ ބަދަލުގައި ރަށު ކައުންސިލަރުންނާއި، އަތޮޅު ކައުންސިލަރުން އިންތިހާބު ކުރެވިގެން ދިޔައެވެ. އެހެނަސް، މާލެގެ މަރުކަޒީ ހިންގުމަށް މާބޮޑު ބަދަލެއް އައިތަނެއް ނުފެނުނެވެ.
ރައީސް ނަޝީދުގެ ސަރުކާރުންވެސް ވަނީ މާލޭގައި އިތުރު ފްލެޓް އެޅުމުގެ މަޝްރޫއެއް ފަށާފައެވެ. އެގޮތުން އަރަބިއްޔާ ބިމާއި ގާކޮށި ބިމުގައިވަނީ ފްލެޓް އަޅާފައެވެ. އަތޮޅުތަކުގެ ތަރައްގީއަށް ދެންވެސް ދިޔައީ އަޅާނުލެވިއެވެ.
ޖަޒީރާ ދިރިއުޅުމެއް ކަށަވަރު ކޮށްދިނުމަށްޓަކައި އެމްޑީޕީން ވައުދުވެފައިވަނީ މަރުކަޒީ ސަރުކާރު އަތޮޅުތަކަށް ބަހާލައި، ސަރުކާރު މިނިސްޓްރީތަކުގެ ގިނަ މަސައްކަތްތައް ރަށު ކައުންސިލްތަކާއި އަތޮޅު ކައުންސިލްތަކާއި ސިޓީ ކައުންސިލްތަކަށް ބަހާލާށެވެ. އަދި އާއިލާތަކަށް ދިރިނޫޅެވޭ ވަރުގެ ކުދިކުދި ބިންކޮޅާއި ފްލެޓްތަކުގެ ބަދަލުގައި އެމީހުން އިހްތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ފޯރުކޮށް ދިނުމަކީވެސް ވެފައިވާ ވައުދެކެވެ.
އެހެންނަމަވެސް، އަދިވެސް ރާއްޖޭގެ ތަރައްގީގެ މޮޑެލް ބަދަލުވި މަންޒަރެއް ނުފެނެއެވެ. މަރުކަޒީ ވިސްނުން ބަދަލުވި ތަނެއް ނުފެނެއެވެ. ވަކިން ހާއްސަކޮށް، ކޮވިޑްގެ ނުރައްކާތެރި ހާލަތާއިއެކު، ތޮއްޖެހިގެން ގިނަ ބަޔަކު އެއްތަނެއްގައި އުޅުމުގެ ނުރައްކާ ފެނިމެ، އަދި މާލެއަށް ބަރޯސާ ވާންޖެހުމުގެ ދަތި އުނދަގޫ ފެނިމެ، މަރުކަޒީ ވިސްނުމުން ދުރަށް ގޮސް، ލާމަރުކަޒީ ނިޒާމް ހަރުދަނާ ވާތަނެއް އެކަށީގެންވާ ގޮތެއްގައި ނުފެނެއެވެ.
އެޔާއިއެކު ލޯކަލް ކައުންސިލް އިންތިހާބުގެ ނަތީޖާއިން ސަރުކާރަށް ލިބުނީ "ބީ" ރިޕޯޓެކެވެ. އިންތިހާބުގެ ނަތީޖާއިން ލިބުނު ނާކާމިޔާބީ ފެނި ސަރުކާރު ހިންގުމުގައި މައްސަަލަތަކެއް ހުރިކަން ރައީސް ނަޝީދު ވަނީ އޭގެފަހުން ބޭއްވި ނޫސްވެރިންގެ ބައްދަލުވުމުގައިވެސް ވިދާޅުވެފައެވެ. އަބަދުވެސް "އޭ" ރިޕޯޓު ހޯދަމުން އައި އެމްޑީޕީއަށް "ބީ" ރިޕޯޓެއް ލިބުމުގައި ރައީސް ނަޝީދުގެ ނޫނީ ރައީސް ސޯލިހުގެ މައްސަލައެއް އޮންނަން ވާނެ ކަމަށްވެސް ވިދާޅުވިއެވެ.
ސަރުކާރުގެ ހިންގުމަށް ބޮޑެތި ބަދަލުތަކެއް ގެންނަން ޖެހޭކަމާއި ނިޒާމު ބަދަލުކޮށް ވެރިކަން ފޮރޮޅާލުމުގެ ވާހަަކަތައްވެސް ފާޅުކަން ބޮޑު ގޮތެއްގައި ރައީސް ނަޝީދު ދައްކަވާއިރު، މިހާރު ތިން ކޯލިޝަނަކުން އާ މި ސަރުކާރުގެ ވަރަކޮށި ސަރުކާރުގެ މައި ޕާޓީގެ ތެރޭގައި ވަނީ ރައީސް ސޯލިހް އާއި ނަޝީދުގެ މައްޗަށް ބިނާވާ ދެ ފެކްޝަނެއް އުފެދިފައެވެ.
