Advertisement

ހަރުކަށި ފިކުރު ފަތުރާތީ ރ. މަޑުއްވަރީ އިތުރު ތިން މީހަކު ހައްޔަރުކޮށްފި އެވެ.

ފުލުހުން ބުނީ ހަރުކަށި ފިކުރާ ދެކޮޅަށް މަޑުއްވަރީގައި ފުލުހުންނާ ކަމާ ބެހޭ އިދާރާތަކުން ގުޅިގެން ކުރިއަށް ގެންދާ އޮޕަރޭޝަނުގެ ތެރެއިން އިއްޔެ 22 އަހަރުގެ ފިރިހެނަކާއި 26 އަހަރުގެ ފިރިހެނަކާއި 28 އަހަރުގެ ފިރިހެނެއް ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. މި ތިން މީހުންނަކީ ވެސް ދިވެހި ފިރިހެނުންނެވެ.

ހަރުކަށި ފިކުރު ފަތުރާތީ މަޑުއްވަރީގެ ބައެއް ގެތައް ބަލައި ފާސްކުރަން ސަލާމަތީ ބާރުތަކުން އެރަށުގައި ހާއްސަ އޮޕަރޭޝަނެއް ފެށީ މިދިޔަ ޑިސެމްބަރު މަހުގެ 18 ވަނަ ދުވަހު އެވެ.

ހަފްތާ އަކަށް ވުރެ ގިނަ ދުވަސް ފަހުން އެ އޮޕަރޭޝަން ނިންމާލިއިރު ހަރުކަށި ފިކުރު ފަތުރާ ކަމަށް ބުނެ ފުލުހުން ވަނީ ނުވަ ގެއަކާއި ދޯންޏެއް ބަލައި ފާސްކޮށް ތިން މީހަކު ކުރިން ހައްޔަރުކޮށްފަ އެވެ. ހައްޔަރުކުރި މީހުންގެ ތެރޭގައި ހިމެނެނީ 34 އަހަރުގެ މީހަކާއި، 30 އަހަރުގެ މީހެއްގެ އިތުރުން 29 އަހަރުގެ މީހެކެވެ.

މިއެންމެންގެ ބަންދަށް ކޯޓުން މުއްދަތު ޖަހާފައިވާތީ އެ މީހުން އަދިވެސް ތިބީ ފުލުހުންގެ ބަންދުގަ އެވެ.

ފުލުހުން ހިންގި އެއޮޕަރޭޝަނުގައި އެރަށުގެ ބައެއް ކުޑަކުދިންނަށް ވެކްސިން ދިނުމަށް އިންކާރު ކުރި އާއިލާއެއްގެ މީހުން އެކުދިންނަށް ވެކްސިން ދޭން ފަހުން އެއްބަސްވުމުން އެ އާއިލާގައި ހިމެނޭ ތިން ކުޑަކުއްޖަކަށް ވެކްސިން ވެސް ދީފައިވެ އެވެ. އަދި ކިޔަވަން ފޮނުވުމާއި ވެކްސިން ދިނުމަށް އިންކާރު ކުރި އެހެން އާއިލާއަކަށް ޖެންޑާ މިނިސްޓްރީގެ ފަރާތުން ތަކުރާރުކޮށް ނަސޭހަތް ދިނުމުން ވެސް ނަސޭހަތް ގަބޫލު ކޮށްފައި ނުވާކަން ފުލުހުން ވަނީ ފާހަގަކޮށްފަ އެވެ. އަދި ފުލުހުންގެ އެހީތެރިކަމާ އެކު އެ ކުޑަ އަންހެން ކުއްޖާ މައިންބަފައިންގެ އަތުން ނެގުމަށްފަހު ބޮޑު ދައިތައަކާ ވަނީ ހަވާލުކޮށްފަ އެވެ.