އެ ދެ ބޭފުޅުން މަގާމުން ވަކިކުރިކަން ރައީސް އޮފީހުގެ  ތަރުޖަމާނު މަބްރޫކް އަބްދުލްއަޒީޒު ވަނީ ސީއެންއެމް އަށް ކަށަވަރުކޮށްދެއްވާފައެވެ.

ނިޝާމާ އާއި ޝިޔާނާ މިއަދު މަގާމުން ވަކިކޮށްފައި މިވަނީ ވެންޓިލޭޓަރު ހިޔާނާތުގެ މައްސަލައިގައި ގިނަ ދުވަސްތަކެއް ވަންދެން މުސަރަ ހިނގާ ގޮތައް ސަސްޕެންޑުގައި ބެހެއްޓުމަށްފަހުއެވެ. އެގޮތުން ވެންޓިލޭޓަރުތައް ހޯދުމުގައި އޮޅުވާލުންތަކެއް ހުރި ކަމަށް އޮޑިޓު ރިޕޯޓުންވެސް ވަނީ ދައްކާފައެވެ.

ނިޝާމާ އަކީ ވެންޓިލޭޓަރުތައް ސަޕްލައިކޮށްދޭނެ ފަރާތެއް ހޯދުމަށް އެކުލަވާލި ހެލްތް މިނިސްޓްރީގެ ބިޑް ކޮމިޓީގައިވެސް ހިމެނޭ ފަރާތެކެވެ.

ކޮވިޑް-19 ގެ ފަރުވާ އަށް ދުބާއީގެ ކުންފުންޏެއް މެދުވެރިކޮށް ރާއްޖެ ގެންނަން އުޅުނު ވެންޓިލޭޓަރުތަކުގެ މައްސަލައިގައި ހިންގާފައިވާ ކަމަށް ތުހުމަތު ކުރެވޭ ކޮރަޕްޝަންގެ މައްސަލައާ ގުޅިގެން އާބިޓްރޭޝަނަށް ދިއުމަށްވެސް އެޓާނީ ޖެނެރަލްގެ އޮފީހުން ވަނީ ނިންމާފައެވެ.

ދިވެހި ސަރުކާރުން ދުބާއީގެ އެގްޒެކިއުޓާސް ޖެނެރަލްއާ ހަވާލުކުރީ 75 ވެންޓިލޭޓަރު ހޯދުމަށެވެ. އޭގެ ތެރެއިން ލިބިފައިވަނީ 15 ވެންޓިލޭޓަރެވެ. އެއްބަސްވުމުގެ ދަށުން އަދިވެސް 60 ވެންޓިލޭޓަރު ފޮނުވަން ޖެހެއެވެ. އެ ކުންފުނިން ވެންޓިލޭޓަރުތައް ފޮނުވަން 34 މިލިއަން ރުފިޔާ ހުށަހެޅުމުން މާލިއްޔަތު ގަވާއިދާ ހިލާފަށް 30 މިލިއަން ރުފިޔާ އެއްފަހަރާ ވަނީ ދީފަ އެވެ. މި ފައިސާ ދޫކުރީ އެއްބަސްވުމުގައި ސޮއި ވެސް ނުކޮށެވެ.