އިބްރާ މިހެން ވިދާޅުވެފައި މިވަނީ، އެމްޑީޕީން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ލީޑަޝިޕުން ، އެ ޕާޓީން މިހާރު އެންމެ އިސްކަމެއް ދީގެން ކުރަމުންދާ މަސައްކަތަކީ ރައީސް ނަޝީދަށް އަމާޒުކޮށް މި މަހުގެ ހަ ވަނަ ދުވަހު ދެވުނު ޓެރަރިސްޓް ހަމަލާގެ ތަހުގީގު ހިންގުންކަމަށް ބުނެފައިވާ ދަނޑިވަޅެއްގައެވެ.

މިކަމާ ގުޅޭގޮތުން އިބްރާ ސީއެންއެމް އަށް ވިދާޅުވީ އިދިކޮޅު ފަރާތަކީ ޕީޕީއެމް ޕީއެންސީތޯ ނުވަތަ ރައީސް ނަޝީދުތޯ ސުވާލު އުފައްދަން ޖެހުނީ، ސަރުކާރުން ކުރާ ކަންތައްތަކަށް ފާޑުކިޔައި ސަރުކާރުގެ ނުރަނގަޅުގަކަން ދައްކަން އާންމުކޮށް މަސައްކަތް ކުރާނީ އިދިކޮޅުން ކަމުގައި ވާތީ ކަމަށެވެ. މިއަދު ސަރުކާރުގެ ހުރިހާ ބާރެއް އެމްޑީޕީގެ އަތުގައި އޮވެމެ، ރައީސް ނަޝީދަށް ދިން ހަމަލާގެ ވާހަކަ ފަދަ ސެންސިޓިވް ވާހަކައެއް ސަރުކާރު ބަދުނާމުވާގޮތައް ޕްރެސްތައް ބާއްވައިގެން ދެއްކުމަކީ އެއީ އެމްޑީޕީން ކޮށްގެންވާނެ ކަމެއް ނޫން ކަމަށެވެ.

 އިބްރާ ކުރެއްވި ޓުވީޓެއްގައި ވިދާޅުވީ މިއަދު އެމްޑީޕީގެ ޗެއާޕާސަން ހަސަން ލަތީފް ނުކުމެ ޕާޓީން ކުރަން އޮތް އެންމެ ބޮޑު މަސައްކަތަކީ ނަޝީދަށް ދިން ހަމަލާގެ ޖިނާއީ ތަހުގީގެއް ހިންގުންކަމަށް ބުނުމުން ހައިރާންވާ ކަމަށެވެ. 

މިހާރު ރާއްޖޭގެ ބާރުތައް އޮތީ އެމްޑީޕީގެ އަތުގައިކަން ފާހަގަކުރައްވައި އިބްރާ ވިދާޅުވީ ، އެހެންކަމުން ރައީސް ނަޝީދަކީ "ސަރުކާރުގެ ވިކްޓިމް" އެކޭ ކިޔުމުގެ މާނައެއް ނެތް ކަމަށެވެ.

ރައީސް ނަޝީދަކީ ސަރުކާރުގެ ވިކްޓިމް އެކޭ ކިޔުމުން އިބްރާ ވަނީ ރައީސް ސޯލިހާއި ރައީސް ނަޝީދުގެ އެއްވެސް ގުޅުމެއް ނެތީތޯ ސުވާލު އުފައްދަވާފައެވެ. 

އިބްރާ ވިދާޅުވީ މިހާރު މި އޮތް ސަރުކާރަކީ އޭނާއަށް މާ ކަމުދާ ސަރުކާރެއް ނޫން ކަމަށެވެ. ނަމަވެސް 2023 އާ ހަމައަށް ސަރުކާރުގެ ވެރިއަކީ ރައީސް ސޯލިހު ކަމީ ކަން އޮތްގޮތް ކަން އިބްރާ ފާހަގަކުރެއްވިއެވެ. 

ރައީސް ނަޝީދަށް ދިން ހަމަލާއަށް ފަރުވާ ހޯއްދެވުމަށް އެމަނިކުފާނު މިހާރުވެސް ހުންނެވީ ޖަރުމަނުގައެވެ. ރައީސް ސޯލިހަކީ ރައީސް ނަޝީދުގެ އެންމެ ގާތް އެކުވެރިޔާ ކަމަށް ގިނަ ބަޔަކު ގަބޫލުކުރެއެވެ. ނަމަވެސް އެމްޑީޕީގެ ތެރޭގައި ރައީސް ނަޝީދަށް ސަޕޯޓުކުރާ ބޭފުޅުންނާއި ރައީސް ސޯލިހަށް ސަޕޯޓުކުރާ ބޭފުޅުންގެ ކޮންމެވެސް ވަރެއްގެ ބައިބައިވުންތަކެއް އޮތްކަމުގެ އަޑުތަކެއް ވަނީ ފެތުރިފައެވެ. އަދި ރައީސް ނަޝީދަށް ދެވުނު ޓެރަރިސްޓް ހަމަލާއަކީ ސީދާ ސަރުކާރުގެ ތެރެއިން ރޭވިގެން ދެވުނު ހަމަލާއެއް ކަމަށް އެމަނިކުފާނުގެ ދަރިކަނބަލުން މީރާ ލައިލާ ނަޝީދުވެސް ވަނީ ތުހުމަތު ކުރައްވާފައެވެ.