500 ސޮޔާއެކު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ހުށަހަޅަން ނިންމާފައިވާ މި ޕެޓިޝަނުގައި މިހާތަނަށް 400 އެއްހާ މީހުން ވަނީ ސޮއިކޮށްފައެވެ.
ރިސޯޓް ވޯކާސް މޯލްޑިވްސް އިސްވެ އޮވެ ފަށާފައިވާ މިޕެޓިޝަނަކީ ކޮވިޑް-19ގެ ސަބަބުން އެޗްޕީއޭއިން އަޅާފައިވާ ފިޔަވަޅުތަކުގެ ސަބަބުން އަނބިދަރިންނާ ބައްދަލުނުވާތީ އެކަމަށް ހައްލެއް ހޯދައިދިނުމަށާއި ސަންސެޓް ގާނޫނަށް ގިނަ ރިސޯޓުތަކުން އަމަލުނުކުރާތީ އެކަން ރައީސްގެ ސަމާލުކަމަށް ގެނައުމަށް ހަދާފައިވާ ޕެޓިޝަނެކެވެ.
ޕެޓިޝަނުގެ ސޮއިކުރި ބައެއް ފަރާތްތަކުން ބުނީ ޕެޓިޝަނުގައި ސޮއިކުރީ ރިސޯޓު މުވައްޒަފުންގެ ހައްގު ހޯދައިދީ އާއިލާއާއެކު ވަގުތު ހޭދަކުރުމުގެ ހައްގުން މަހުރޫމް ކުރާތީ ކަމަށެވެ.
ރިސޯޓު ވޯކާސް މޯލްޑިވްސް އިން ވަނީ ރިސޯޓު މުވައްޒަފުން ތުނބުޅި ބެހެއްޓުމާ ބެހޭގޮތުންވެސް ޕެޓިޝަނެއް ތައްޔާރުކޮށްފައެވެ. މި ޕެޓިޝަން ރައީސަށް ހުށަހެޅުމުގެ މަސައްކަތް ކުރަމުން އަންނަކަމަށް އެ ފަރާތުން ވަނީ ބުނެފައެވެ.
