ރާއްޖޭގައި އަނެއްކާ ވެސް އަންހެން ކުދިން ހިތާނުކުރުމުގެ ސަގާފަތް އާލާވަމުން އަންނަކަމަށް ހިއުމަން ރައިޓްސް ކޮމިޝަނުން ވަނީ ދާދި ފަހުން ބުނެފައެވެ. މިއާއެކު ބައެއް ދީނީ އިލްމުވެރިން މިކަމަށް ހިތްވަރުދޭ ގޮތަށް ވާހަކަ ދައްކަމުން އަންނާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
މިކަމާ ގުޅިގެން ޝެއިހް އަލީ ޒައިދު ކުރެއްވި ޓްވީޓެއްގައި ވިދާޅުވީ ރާއްޖޭގައި އަންހެން ކުދިން ހިތާނު ކުރާ އެއްވެސް މީހަކު ނޫޅޭ ކަމަށާއި އެއީ މުޅިން ހުއްޓިފައި އޮތް ކަމެއް ކަމަށެވެ.
އަދި ހިތާނު ކުރުމުގެ ވާހަކަ ދެއްކުމުގެ ބަދަލުގައި، މުންކަރާތްތައް މަނާކުރާ ބިލުގެ ވާހަކަ ދެއްކުން މާ އައުލާ ކަންބޮޑުވެގެންވާ ކަމަށް ޒައިދު ވިދާޅުވިއެވެ. ޒައިދު ވިދާޅުވީ މި ދަނޑިވަޅުގައި ހުރިހާ ފަރާތްތަކުން ވެސް އެ ބިލަށް އިތުރަށް ސަމާލުވާން ޖެހޭ ކަމަށެވެ.
އަންހެން ކުދިން ހިތާނުކުރުމަށް ހިތްވަރުދީ ވާހަކަ ދެއްކެވި އެއް ދީނީ އިލްމުވެރިޔަކީ ޑރ. މުހައްމަދު އިޔާޒް އަބްދުއްލަތީފްއެވެ. ޑރ އިޔާޒު ވިދާޅުވީ އަންހެން ކުދިން ހިތާނު ކުރުމަކީ ދީނުގައި ނެތް ކަމެއް ކަމުގައި ބުނުމަކީ ދޮގެއް ކަމަށާއި އަންހެން ކުދިން ހިތާނު ކުރުމަކީ ދީނުގައި އޮތް ކަމެއް ކަމަށާއި ނަމަވެސް އެއީ ވާޖިބެއް ނޫން ކަމަށެވެ.
އަންހެން ކުދިން ހިތާނު ކުރުމަށް ޑރ. އިޔާޒް ހިތްވަރު ދީފައިވާ ކަމަށް ބުނެ، މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް މަޖިލީހުގެ ގަލޮޅު އުތުރު ދާއިރާގެ މެންބަރު މީކާއިލް ނަސީމް ވަނީ މައްސަލައެއް ހުށަހަޅުއްވާ ފައެވެ. އަދި އެކަމާއި ގުޅިގެން ޑރ. އިޔާޒަށް ވަނީ ބޮޑެތި ފާޑުކިޔުން ތަކެއްވެސް އަމާޒުވެފައެވެ.
