ރައީސް ނަޝީދު މިހެން ވިދާޅުވެފައިވަނީ އެ މަނިކުފާނަށް އަމާޒުކޮށް ދެވުނު ނުރައްކާތެރި ޓެރެރިސްޓް ހަމަލާ މަޖިލީހުގެ 241 ކޮމެޓީއިން ތަހުގީގުކޮށް އެކޮމިޓީއިން އެކުލަވާލި ރިޕޯޓު ނެރުމުން އެ މަނިކުފާނު ކުރެއްވި ޓްވީޓެއްގައެވެ.
މި ޓްވީޓުގައި އެމަނިކުފާނު ވަނީ އެ ކޮމެޓީގެ މުގައްރިރާއި އެކޮމެޓީގައި ދެންތިއްބެވި ހުރިހާ މެމްބަރުނަށްވެސް ވަރަށް ބޮޑަށް ޝުކުރުއަދާކުރައްވާފައެވެ. މީގެ އިތުރުން އެ ޓްވީޓުގައި އެ މަނިކުފާނުވަނީ 19 ވަނަ މަޖިލީސް ވަރަށް ވެސް ތަފާތު ކަމަށް ވިދާޅުވެފައެވެ.
މަޖިލީހުގެ 241 ކޮމިޓީން މިމަހުގެ އަށްވަނަދުވަހު ނެރުނު ގާތްގަނޑަކަށް 270 ގަނޑުގެ ރިޕޯޓުގައި ނަޝީދަށް ހަމަލާ ދިނުމުގެ ކުރިންނާއި ހަމަލާދިން ދުވަހު އަދި އޭގެ ފަހުން ކަން ހިނގާފައިވާ ގޮތުގެ ވަރަށް ތަފްސީލީ މައުލޫމާތު ހިމަނާފައިވެއެވެ.
މި ރިޕޯޓު އާންމުކުރުމުން އެމްއެންޑީއެފްގެ ކުރީގެ ކެޕްޓަން އަލީ އިހްސާން މިކަމާއި ކަންބޮޑުވުން ފާޅުކޮށްފައިވެއެވެ. އޭނާ ވިދާޅުވީ މިރިޕޯޓްގައި އިތުރު ހަަމަލާތައް ރާވާ ފަރާތްތަކަށް އެކަމަށް މަގުފަހިވެދާނެ ފަދަ މައުލޫމާތުތަކެއް އާއްމުކޮށްފައިވާކަމަށެވެ.
މަޖިލީހުން އާއްމު ކޮށްފައިވާ އެރިޕޯޓަކީ ގައުމީ ސަލާމަތީ އިދާރާތަކާއި ކަމާއި ބެހޭ އެހެނިހެން އިދާރާތަކުގެ އިސްވެރިން ހާޒިރުކޮށްގެން މައުލޫމާތު ނަގައި އެމައުލޫމާތަށް ބިނާކޮށް އެކުލަވާލާފައިވާ ރިޕޯޓެކެވެ.
