
ފިލިޕީންސްގެ މެނިލާގައި މިމަހުގެ 3 އިން 4 އަށް ކުރިއަށްދާ 7 ވަނަ ގްލޯބަލް މިނިސްޓީރިއަލް ސަމިޓް ފޯ ޕޭޝަންޓް ސޭފްޓީގައި ރާއްޖެ ތަމްސީލުކުރައްވަނީ ހެލްތު މިނިސްޓަރު އަބްދުﷲ ނާޒިމް އިބްރާހިމްއެވެ.
މި ސަމިޓަކީ ދުނިޔޭގެ ސިއްހީ ދާއިރާގެ ލީޑަރުންނާއި ތަޖުރިބާކާރުން އެއްތަނަކަށް އެއްވެ ސިއްހީ ފަރުވާގެ ފެންވަރު ރަނގަޅުކުރުމާއި ބަލިމީހުންގެ ރައްކާތެރިކަން ކަށަވަރުކުރުމަށް ބާއްވާ ވަޒީރުންގެ ފެންވަރުގެ ސަމިޓެކެވެ. މި ސަމިޓްގައި ގްލޯބަލް ޕޭޝަންޓް ސޭފްޓީ އެކްޝަން ޕްލޭން 2021-2030 ގައި ކަނޑައަޅާފައިވާ ކަންކަން ކުރެވިފައިވާ މިންވަރު ބަލައި، ބަލިމީހުންގެ ރައްކާތެރިކަމުގައި އިސްކަންދޭ ދާއިރާތަކާ ބެހޭ ގޮތުން މަޝްވަރާކޮށް، އެކަންކަން ހާސިލްކުރުމަށް ކުރިމަތިވާ ގޮންޖެހުންތަކަށް ހައްލު ހޯދުމަށް މަސައްކަތްކުރާނެއެވެ.
ސަމިޓްގެ ހަވާސާގައި ބޭއްވޭ ބައްދަލުވުންތަކުގައި، ސިއްހީ ދާއިރާގެ މުހިންމު ޖަމިއްޔާތަކާއި ބައިނަލްއަގުވާމީ ބައިވެރިންނާ ގުޅިގެން މަސައްކަތްކުރެވޭނެ ދާއިރާތައް ދެނެގަނެވޭނެ ކަމަށް ހެލްތް މިނިސްޓްރީން ބުނީއެވެ.
ރާއްޖޭގައި ބަލިމީހުންގެ ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް ކުރަމުންދާކަން ފާހަގަކޮށްފައިވެއެވެ. މީގެ ތެރޭގައި ނޭޝަނަލް ޕޭޝަންޓް ސޭފްޓީ ޕްރޮގްރާމް ތަންފީޒުކުރުމާއި، ހޮސްޕިޓަލްތަކުގައި ކޮލިޓީ އިމްޕްރޫވްމަންޓް އެންޑް ޑިވެލޮޕްމަންޓް ޔުނިޓްތައް ގާއިމްކުރުމާއި، 178 ސިއްހީ މަރުކަޒެއްގައި ޕޭޝަންޓް ސޭފްޓީ ފޯކަލް ޕޮއިންޓްތައް އައްޔަންކުރުން ހިމެނެއެވެ.