ޖުމަލަ 12 ގަޑިއިރުގެ ހޫނު ބަހުސަކަށްފަހު ފާސްކުރި މި ބިލަކީ ވަގުފު ބޯޑުތަކުގެ ހިންގުމަށް ބޮޑެތި ބަދަލުތަކެއް ގެންނަ ބިލެކެވެ.
މިގޮތުން ވަގުފް ފަންޑުތައް އިންޑިއާ ސަރުކާރުގެ ކޮންޓްރޯލް އޮންނަ ގޮތަކަށް މެނޭޖުކުރަން އަދި ރެޖިސްޓްރީ ކުރަންޖެހެއެވެ.
އިންޑިއާ ސަރުކާރުން ބުނާ ގޮތުގައި މި ބިލުގެ ސަބަބުން ވަގުފު މުދާ ބެލެހެއްޓުމުގައި ހާމަކަން ބޮޑުވެ، ޖަވާބުދާރީވުން އިތުރުވާނެއެވެ.
ނަމަވެސް އިދިކޮޅު ޕާޓީތަކުން ބުނަނީ މި ބިލަކީ މުސްލިމުންގެ ހައްގުތައް ހަނިކުރުމަށް އަމާޒުކޮށްފައިވާ ބިލެއް ކަމަށެވެ. ވަގުފު ބޯޑުތަކުގައި މުސްލިމުން ނޫން މެންބަރުން ހިމެނުމާއި ސަރުކާރުގެ ބާރު އިތުރުކުރުން ފަދަ ކަންކަމަކީ މުސްލިމުންގެ ދީނީ މުދަލުގެ މައްޗަށް އޮންނަ ބާރު ކުޑަކުރުމަށް ކުރާ ކަމެއް ކަމަށް ފާޑުކިޔާ ފަރާތްތަކުން ބުނެއެވެ.
މި ބިލު ފާސްވުމާ ގުޅިގެން އިންޑިއާގެ އެކި ސަރަހައްދުތަކުގައި އިހުތިޖާޖުތައް ފެށިފައިވާއިރު، ދެން މި ބިލު ހުށަހެޅޭނީ ރާޖިޔާ ސަބާއަށެވެ.
ރާޖިޔާ ސަބާގައި ސަރުކާރަށް އެހާ ފަހި ގޮތަކަށް ކަންކަން ނުހިނގާނެކަމަށް ރިޕޯޓުތައް ބުނެއެވެ.
