ކޮންމެ ބަޔަކު ވެރިކަމާ ހަވާލުވެފައި ވެސް ވަރަށް ފޯރީގައި އެ ވާހަކަ ދައްކަ އެވެ. ނަމަވެސް ފަސް އަހަރުގެ ދައުރު ނިމުމުގެ ކުރިން އެ މައްސަލަ މަތިން ހަނދާން ނައްތާލާ ކަހަލަ އެވެ. މާލެއަށް ކުރިމަތިވެފައިވާ ވެހިކަލު މައްސަލައަކީ ބަޔަކު ހިންގާފައިވާ ޖަރީމާއެއް ކަމަށް ދޭހަވާ ގޮތަށް ވަޒީރުންނާއި ސަރުކާރުގެ ވެރިން ވަނީ ވާހަކަ ދައްކާފައެވެ. ނަމަވެސް އެ ފަދަ ބޮޑު މައްސަލައެއް ހައްލުކުރުމުގައި ވެސް ސަރުކާރުތަކުން ނުކުޅެދިފައިވާއިރު އެކަމަށް އޮތް ހައްލެއް އެބަ އޮތްތޯ މިއީ ވެސް ސުވާލެކެވެ.
ސައިކަލާއި ހަތަރުފޮރުޅުލި ވެހިކަލުން މާލެ ތޮއްޖައްސާލި އިރު ހަތަރު ފުރޮޅުލީ އުޅަނދުފަހަރު މާލެއަށް އެތެރެކުރެވުމަށް ޒަމާނުންސުރެ ހަރުދަނާ ގަވާއިދެއް އޮވެ އެވެ. ނަމަވެސް ހިތާމައަކީ އެ ގަވާއިދަށް އަމަލުނުކުރުމެވެ. ނުވަތަ އެ ގަވާއިދުގެ ބާރެއް ނެތްކަމަށް އެ ގަވާއިދު ތަންފީޒުކުރަން ތިބޭ މީހުން ހެދުމެވެ.
ގަރާޖު ސިޓީގެ ވާހަކައަކީ ވަރަށް އާންމު ވާހަކަ އެވެ. އެއް ގަރާޖަކަށް 10 ވަރަކަށް އުޅަނދު ރަޖިސްޓްރީކޮށްފައިވާ ވާހަކަ ސަރުކާރުން ވަނީ ބުނެފަ އެވެ. ރައީސް ސޯލިހު ވެރިކަމާ ހަވާލުވެފައި ވެސް އެމަނިކުފާނުގެ ޓްރާންސްޕޯޓް މިނިސްޓަރު އާއިޝަތު ނަހުލާގެ އެޖެންޑާގެ އެންމެ ކުރިއަށް ގަރާޖު މައްސަލަ ލެއްވިކަމަށް ވެ އެވެ. އަދި އެ މައްސަލަ ހައްލުކޮށް ގަރާޖު ސިޓީ މައްސަލައަށް ހައްލު ގެންނަވާނެކަމަށް މިނިސްޓަރު ނަހުލާ ވިދާޅުވި އެވެ.
ގަރާޖު ސިޓީގެ މައްސަލައަކީ ޓްރާންސްޕޯޓް އޮތޯރިޓީން ހިންގާފައިވާ ބޮޑު ޖަރީމާއެއްގެގޮތުގައި ސިފަކޮށް އެކަމުގައި ބައިވެރިވި މީހުންނާއި އެކަންކަން ކޮށްފައިވާގޮތް ބަލައި ފިޔަވަޅު އަޅާނެކަމަށް މިނިސްޓަރު ނަހުލާ ވިދާޅުވި އެވެ.
މިނިސްޓަރުކަމާ ހަވާލުވެ ވަޑައިގެންނެވިތާ 24 ވަނަ އަށްވީ ދުވަހު ބޭއްވި ނޫސްވެރިންގެ ބައްދަލުމުގައި މިނިސްޓަރު ނަހުލާ ވިދާޅުވީ "މިހާރުވެސް ރަޖިސްޓްރޭޝަން ހައްދައިފައިވާ ކާރުތަކުގެ [ރަޖިސްޓްރީކުމުގައި] ވަރަށް ގިނަ މައްސަލަ އެބަ ހުރިކަމަށާއި އެއްގަރާޖަކަށް އެތައް ބައިވަރު ކާރުތައް ރަޖިސްޓްރީ ކުރުން ފަދަ މިކަހަލަ ކަންތައް ހިނގައިފާ އެބަ ހުރިކަމަށެވެ.
އެ ޕްރެސްގައި މިނިސްޓަރު އިތުރަށް ވިދާޅުވީ އޮޅުވާލައިގެން ގަވާއިދާ ހިލާފަށް މީގެ ކުރިން ރަޖިސްޓްރީ ކުމުގައި ޝާމިލުވާ ފަރާތްތަކަކީ "ކޮންމެ ފެންވަރެއް ކޮންމެ ބަޔެއް" ކަމުގައި ވީ ނަމަވެސް އެ ފަރާތްތަކާ މެދުވެސް ފިޔަވަޅު އެޅުމަށް ރައީސް އިބްރާހިމް މުހައްމަދު ސޯލިހް އަންގަވާފައިވާ ކަމަށެވެ.
"އަޅުގަނޑުމެން މި އޮންނަ ގާނޫނީ އިމުގެ ތެރެއިން ،އުސޫލުގެ ދަށުން، އަޅުގަނޑުމެން އިސްޕެކްޝަން ޓީމެއް ކަނޑައަޅާ އެތަންތަން ބަލާ، ގަވާއިދާ ހިލާފަށް ރަޖިސްޓްރީ ކޮށްފައިވާ ކާރުތަކުގެ ރެޖިސްޓްރީތައް އުވާލާނަން،" މީގެ ދެ އަހަރާއި ހަތް މަސް ކުރިން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ނަހުލާ ވިދާޅުވި އެވެ.
އެ ޕްރެސްގައި ނަހުލާ ވިދާޅުވީ ރައްޔިތުންގެ ފަރާތުން އެމިނިސްޓްރީއަށް އެންމެ ބޮޑަށް ލިބޭ ޝަކުވާއަކީ ގަރާޖު ސިޓީގެ މައްސަލަ ކަމަށާއި މިހާރު އެކަންތައްތަކައް ހައްލެއް ހޯދުމަށް ޓީމެއް ނަގައިފައިވާ ކަަމަށެވެ. ނަމަވެސް ސުވާލަކީ އެ ޓީމުން ކުރި ކަމެއްގެ ސަބަބުން ލިބުނު ފަސޭހައެއް އެބައޮތްތޯ އެވެ. ނުވަތަ އެއް ގަރާޖަށް ގިނަ ކާރުތައް ރަޖިސްޓްރީކުރުމުގައި ބައިވެރިވި މީހުންނާ މެދު ފިޔަވަޅެއް އެޅުނުތޯ އެވެ. މި ހުރީ ހުސް ސުވާލެވެ.
މިނިސްޓަރު ނަހުލާ އެ ވާހަކަތައް ދެއްކެވިތާ މިހާރަށް ތިން އަހަރުވަނީ އެވެ. އެ ވާހަކަތައް ދެއްކެވި ފަހުން ގަރާޖު ސިޓީ އުވާލުމުގެ މައްސަލައެއް މަޖިލީހަށް ވެއްދި އެވެ.
ނޮޅިވަރަމް ދާއިރާގެ އަމިއްލަ މެންބަރު މުޙައްމަދު ނަޝީދު ޢަބްދުﷲ (މޮސްޓާ) ގަރާޖު ސިޓީ އުވާލާ ގޮތަށް ބިލު ހުށަހެޅުމާ ގުޅިގެން އެ ބިލަށް ގިނަ ފާޑުކިތުންތައް އަމާޒުވި އެވެ.
އެމްޑީޕީގެ މަޖިލީސް މެމްބަރުންނާއި ކުރީގެ ހައުސިން މިނިސްޓަރު އަދި ފަހުން މާލޭ މޭޔަރުގެ ގޮނޑި ކާމިޔާބު ކުރެއްވި ޑރ. މުހައްމަދު މުއިއްޒު ވެސް ހިމެނިވަޑައިގަންނަވަ އެވެ.
މޮސްޓާ ހުށަހެޅި އެ ބިލުގައި ލިޔެފައި އޮތީ ގަރާޖު ސިޓީ މެދުވެރިކޮށް ހިނގާ ކޮރަޕްޝަންތައް މި ސަރުކާރަށް ނުބެލުނު ކަމަށާއި ޚިޔާނާތް ހިނގަމުންދާތީ ނިޒާމު އުވާލުމަކީ ޙައްލެއް ނޫން ކަމަށް ބޮންޑޭ ވިދާޅުވިއެވެ. އަދި ތަހުގީގުކޮށް ހިޔާނާތުގައި ބައިވެރިވި ފަރާތްތަކަށް ފިޔަވަޅު އެޅުމަށް ގޮވާލާފަ އެވެ.
ގަރާޖު ސިޓީ މައްސަލާގައި ވާހަކަ ދައްކަވަމުން މާފަންނު މެދު ދާއިރާގެ އެމްޑީޕީގެ މެންބަރު އިބްރާޙީމް ރަޝީދު (ބޮންޑެ) ވިދާޅުވީ އެއްގަމު ދުއްވާ އުޅަނދު ރަޖިސްޓަރީ ކުރުމަށް ގަރާޖު ސިޓީ ބޭނުން ނުވާ ގޮތަށް އެއްގަމު ދަތުރުފަތުރުގެ ގާނޫނު އިސްލާހު ކޮށްފިނަމަ، އެމްޑީޕީގެ ޕީޖީ ގުރޫޕް ބޮޑު ތަނުން ފެއިލް ވާނެކަމަށެވެ.
ގަރާޖު ސިޓީ އުވާލުމާއި މެދު މާލޭގެ އިންތިހާބީ މޭޔަރު ގޮތުގައި އޭރު ހުންނެވި ޑރ. މުހައްމަދު މުއިއްޒު ވިދާޅުވީ މާލެ ރައްޔިތުންގެ ޚިޔާލާއި މަޝްވަރާއާ ނުލައި އެއްވެސް ހިފެހެއްޓުމެއް ނެތި ވެހިކަލް އިތުރުވާ ގޮތަށް ޤާނޫނެއް އިސްލާހު ނުކުރުމަށެވެ. އެގޮތަށް އެކަން ކޮށްފި ނަމަ މާލެ ތޮއްޖެހުން އިތުރަށް ބޮޑުވެގެންދާނެކަމަށް އޭނާ ވިދާޅުވި އެވެ.
އެ ވާހަކަތަކާއި މިނިސްޓަރު ނަހުލާ ވިދާޅުވެފައިވާ ވާހަކަތައް ހަނދާން ނެތިދާނެ އެވެ. ނަމަވެސް ގަބޫލު ކުރަންޖެހޭ ހަގީގަތަކީ ވެހިކަލް ގިނަވެގެން ކުރިމަތިވެފައިވާ މައްސަލައަށް މާ ބޮޑު ހައްލެއް އަދި ވެސް ހޯދިފައިނުވާކަމެވެ. އެއް ގަރާޖަކަށް ގިނަ ކާރު ރަޖިސްޓްރީކުރި ބަޔަކަށް ލިބުނީ މަންފާ އެވެ.
ގާނޫނާ ހިލާފަށް ހިންގި ހިޔާނާތުގެ ކުށަށް ލިބުނު އަދަބެއް ވެސް ނެތެވެ. އަދި އެ ވާހަކަ ވެސް މިހާރު ހުއްޓިއްޖެ އެވެ. މިނިސްޓަރު ނަހުލާގެ ރާގު ބަދަލުވެ އެއީ ނުދައްކާ ނުވަތަ ނުވާ ކަމެއް ކަހަލަ އެވެ. ނަމަވެސް ރައްޔިތު މީހާއަށް އޮތް ތުރާ ކުޑައެއް ނޫނެވެ. އެންމެ ފަހުން ގަރާޖު މައްސަލަ މި ދިޔައީ ސިޓީ ކައުންސިލަށެވެ.
އިދިކޮޅުން ކޮންޓްރޯލްކުރާ މާލޭ ސިޓީ ކައުންސިލަށް ވެހިކަލް މައްސަލަ ހައްލުކުރުމުގައި ފިޔަވަޅެއް ނަމަވެސް އެޅުމުގެ ފުރުސަތު ލިބުމަކީ މިހާރު ކުރިމަތިވެފައިވާ މައްސަލައަށް ހައްލެއް އަންނާނެކަމެއް ބާވައެވެ. ކަން ހިނގާ މަގަށް ބަލާއިރު ހުރިހާ ޕާޓީއަކުން ވެސް ދައްކަނީ ވާހަކަ އެވެ.
ބޮޑެތި މައްސަލަތައް ހައްލުކުރުމުގައި ކުރިއަށް މާ އަވަސް ފިޔަވަޅެއް އަޅާ ތަނެއް ނުފެނެ އެވެ. އިންތިހާބުވުމަށް ވޯޓް ހޯދަން ދައްކާ ވާހަކަ ފިޔަވާ މާ ބޮޑު ވާހަކައެއް ވެސް ފަހުން ނުދައްކަ އެވެ. މަގާމު ލިބުމާއެކު ހުރިހާ ކަމެއް ހަނދާން ނެތޭ ކަހަލަ އެވެ.
މާލެއަށް ކުރިމަތިވެފައިވާ ވެހިކަލް މައްސަލައަށް ވެސް ވެގެން މިއުޅެނީ އެގޮތް ކަމަށް ފެނެ އެވެ. ދައްކަނީ ހުސް ވާހަކަ އެވެ. މައްސަލަ ހައްލުކުރުމުގެ ކެރުންތެރިކަމެއް ވެރިންގެ ކިބައިން ނުފެނެ އެވެ. އެހެންކަމުން މައްސަލައަށް ހައްލެއް ނުލިބި ދިގުލައިގެން ދިއުން ނޫން ކަމެއް ނުވެ އެވެ. ނަމަވެސް މިއީ ހަމަ މިގޮތަށް ބޭއްވިދާނެ މައްސަލައެއްތޯ އެވެ.
