އިމަޖެންސީގައި ޖެއްސި ބޯޓު، ދޯހާއަށް ދިއުމަށް ރާއްޖެއިން ފުރާފައިވަނީ މިރޭ 7:45 ހާއިރުއެވެ.
މައުލޫމާތު ލިބިފައިވާ ގޮތުގައި ގަތަރު އެއާވޭސްގެ ފްލައިޓު ނަންބަރު ކިއުއާރް677 ފްލައިޓް އިމަޖެންސީގައި ޖައްސާފައިވަނީ ލޭންޑިން ގިޔަރުގ މައްސަލައެއް ދިމާވެގެންކަމަށް ވެ އެވެ. ނަމަވެސް ބައެއް މީޑިއާތަކުން ބުނެފައިވަނީ ކުޑަދޮރުގެ ބިއްލޫރިގަނޑު ލިބުނު ގެއްލުމަކާ ގުޅިގެން ކަމަށެވެ.
އޭވިއޭޓާސް މޯލްޑިވްސް އިން ރިޕޯޓުކޮށްފައިވާ ގޮތުގައި ގެއްލުންވެފައިވަނީ ކޮކްޕިޓްގެ ކުޑަދޮރު ބިއްލޫރިގަނޑަކަށެވެ. ފްލައިޓު އެމަޖެންސީގައި ޖައްސަން ނިންމި އިރު އޮތީ 38،000 ފޫޓު މަތީގައި ކަމަށް ވެސް ވަނީ ރިޕޯޓުކޮށްފައެވެ.
އެމަޖެންސީގައި ފްލައިޓް ޖެއްސި ނަމަވެސް އެއްވެސް މީހަކަށް ގެއްލުމެއް ލިބުނު ކަމުގެ ރިޕޯޓެއް އަދި މިހާތަނަށް ލިބިފައެއްނުވެއެވެ. މި ފްލައިޓުގައި 300 އެއްހާ މީހުން އައީ ދަތުރުކުރަމުންނެވެ.
މި ފްލައިޓު ރައްކާތެރިކަމާއެކު ވެލާނާ އިންޓަނޭޝަނަލް އެއާޕޯޓުގައި ލޭންޑްކޮށްފައިވަނީ މިރޭ 21:15 ގައެވެ.
އެއާޕޯޓުގައި ޑިއުޓީގައި ހުރި މީހަކު ބުނީ އިމަޖެންސީގައި ފްލެޓެއް ޖައްސާކަން އޭނާ މަސައްކަތް ކުރާ ޑިޕާޓްމަންޓަށް އަންގާފައިވާކަމަށެވެ. އެ ޑިޕާޓްމަންޓަށް އަންގާފައިވާގޮތުން ބޯޓަށް ދިމާވެފައިވާ މައްސަލައަކީ ލޭންޑިން ގިޔަރަށް ދިމާވެގެން އުޅޭ މައްސަލަ އެކެވެ.
އިމަޖެންސީގައި ބޯޓް ޖެއްސި ހާދިސާއާ ބެހޭގޮތުން ރަސްމީ އެއްވެސް އިދާރާއަކުން ބަހެއް އަދި ނުލިބެ އެވެ.
