އެޑިޔުކޭޝަން މިނިސްޓްރީން ބުނީ މިއަހަރުގެ އޯ-ލެވެލްގެ ނަތީޖާ މިއަދު ހެނދުނު 10:00ގައި އަދި އެސްއެސްސީ އިމްތިހާނު މެންދުރުފަހު 1:30 ގައި އިމްތިހާނު ސެންޓަރުތަކުން ދޫކުރާނެ ކަމަށެވެ. ފަސްހާސް ނުވަ ސަތޭކަ ފަންސާސް ހަ ދަރިވަރުން ބައިވެރިވި އިމްތިހާނުގެ ނަތީޖާ ފޯރުކޮށްދިނުމުގެ މަސައްކަތްތައް ސެންޓަރުތަކުން ކުރިއަށްގެންދާނެ ކަމަށް ވެސް އެމިނިސްޓްރީން ބުނެއެވެ.
ރާއްޖޭގައި ކޮންމެ އަހަރަކު ބާއްވަމުން ގެންދާ އޮކްޓޯބަރު އަދި ނޮވެމްބަރު އޯލެވެލް އިމްތިހާނު މި އަހަރުވަނީ ކޮވިޑް-19 އާ ގުޅިގެން މެއި ޖޫން އަށް ފަސްކޮށްފަ އެވެ. އެޑިޔުކޭޝަން މިނިސްޓްރީން އޭރު ބުނީ އިމްތިހާނު ފަސްކުރީ ރާއްޖޭގެ ސްކޫލްތަކުގެ ގްރޭޑް 10 ގައި ކިޔަވާ ދަރިވަރުން ބައިވެރިވާ ސާނަވީ ނިންމާ އިމްތިހާނުތަކަށް ބޭނުންވާ ސިލަބަސް ނިންމައި އިމްތިހާން ތަކަށް ތައްޔާރުވުމަށް އެކަށީގެންވާ ވަގުތު ލިބޭނެ ކަމަށް ނުފެންނާތީއެ ގޮތަށް އަމަލު ކުރީ ކަމަށެވެ.
މެއި މަހުގެ ދެ ވަނަ ދުވަހު އެސްއެސްއީ އިމްތިހާނު ފަށާފައިވާއިރު އެ މަހުގެ ހަތަރު ވަނަ ދުވަހު ފެށި އޯލެވެލްގެ އިމްތިހާނުތައް ނިމުނީ ޖޫން މަހުގެ 11 ވަނަ ދުވަހުއެވެ.
