“ވަތަނިއްޔާ ރުއްގަނޑު” ގެ ނަމުން މަޝްހޫރުވެފައި އޮތް މި ރުއްގަނޑު ވަރުވާއަށް ދޫކުރުމަށް ކައުންސިލުން ކުރި އިޢުލާނެއްގައި ބުނެފައިވަނީ، 2 އަހަރު ދުވަހުގެ މުއްދަތަށް ދޫކުރުމަށް ހަމަޖެހިފައިވާ ކަމަށެވެ.
މި ރުއްގަނޑާއި ގުޅޭ ބިޑު، 10 އޮކްޓޯބަރގެ 11:30 ށް ތަކަންދޫ ކައުންސިލްގެ އިދާރާއަށް ހުށަހެޅުމަށްވެސް އެ އިއުލާނުގައި ވަނީ ބުނެފައެވެ.
ތަަކަންދޫ އަކީ ނިސްބަތުން ކުޑަ ރަށަކަށް ވީ ނަމަވެސް މި ރަށަކީ ގިނަ އާސާރުތައް އެ ރަށަކުން ފެންނަން ހުރި ބޯދާ ތާރީޚެއް އޮތް ރަށެކެވެ. އަތޮޅުގެ ވެރިކަން ކުރާ ރަށް ދިއްދޫގެ އިރުމަތީ ފަރާތުން 13 ކިލޯމީޓަރު ދުރުގައި އޮންނަ ތަކަންދޫ އަކީ މިހާރުމީހުން ދިރިއުޅޭ ރަށްރަށުގެ ތަރުތީބަށް ބަލާއިރު 13 ވަނައަށް އޮތް ރަށެވެ. ރަށުގެ ދިގު މިނުގައި 1220 މީޓަރު އޮޮތްއިރު ފުޅާ މިނުގައި ހުރީ 460 މީޓަރެވެ.
948 މީހުންގެ އާބާދީއެއް އޮތް ތަކަންދޫގެ އާބާދީގެ ބޮޑު ބައެއް ދިރިއުޅެމުން ދަނީ ރަށުން ބޭރުގައެވެ. އެގޮތުން މި ރަށުގެ އާބާދީގެ 80 އިންސައްތަ މީހުން ދިރިއުޅެނީ ރަށުން ބޭރުގައެވެ. އޭގެ ތެރެއިން ވެސް ގިނަ ބަޔަކު ދިރިއުޅެމުން ދަނީ ފުރަ މާލޭގައެވެ.
