ރައީސް އޮފީހުން ބުނީ މިއަދު ރައީސް އޮފީހުގައި ކުރިއަށް ދިޔަ މިބައްދަލުކުރެއްވުމުގައި ނަމަލް ވަނީ ރައީސް ސޯލިހް އާ ބައްދަލުކޮށްލެއްވުމުން ޝުކުރު އަދާކުރައްވައި ދެ ގައުމުގެ މެދު އޮންނަ ޒަމާންވީ ގާތް ގުޅުން ފާހަގަކުރައްވާފަ ކަމަށެވެ.
އަދި ރައީސް ސޯލިހް ވަނީ ސްރީލަންކާގެ ކޮވިޑް-19 ގެ ހާލަތާ ގުޅޭގޮތުން ވާހަކަފުޅު ދައްކަވާފައެވެ. އަދި ރާއްޖޭގެ ކޮވިޑްގެ ހާލަތާބެހޭގޮތުން ވާހަކަފުޅު ދައްކަވަމުން އެމަނިކުފާނު ވަނީ މިދިޔަ އަހަރުގެ ޖުލައި މަހު ރާއްޖޭގެ ބޯޑަރު އަލުން ހުޅުވާލުމާއެކު ފަތުރުވެރިކަން ރަނގަޅުވަމުން އަންނަކަން ފާހަގަކުރައްވާފައެވެ.
ލަންކާގެ މިނިސްޓަރު ދެއްކެވި ވާހަކަފުޅުގައި ދިވެހިރާއްޖޭގެ ފަތުރުވެރިކަން ރަނގަޅުވުމުން އަވަށްޓެރި ގައުމުތަކަށް ވެސް އޭގެ ފައިދާކުރާކަން ފާހަގަކުރައްވައި ލަންކާގެ ބޯޑަރުތައް ހުޅުވާލުމަށް ކުރަމުންގެންދާ މަސައްކަތްތަކުގެ މަޢުލޫމާތުތައް ނަމަލް ވަނީ ރައީސް އާއި ހިއްސާކުރައްވާފައެވެ.
މީގެ އިތުރުން، ސްރީލަންކާގެ ދެކުނުގައި އަލަށް ހުޅުވުމަށް ހަމަޖެހިފައިވާ އެއާޕޯޓްގެ މަސައްކަތް ނިމުމުން ދިވެހިރާއްޖެއާއި ސްރީލަންކާއާއި ދެމެދު ދަތުރުތައް އިތުރުވާނެކަންވެސް ސްރީލަންކާގެ މިނިސްޓަރު ފާހަގަކުރެއްވިއެވެ.
ސްރިލަންކާގެ ގައުމީ ފުޓް ބޯޅަ ޓީމްގެ ޖާސީއެއް އެގައުމުގެ ޔޫތު މިނިސްޓަރު ވަނީ ރައީސްއަށް އަރުވާފަ
ދެ ގައުމުގެ މެދުގައިވާ ދޭދޭ ގުޅުންތައް އިތުރަށް ބަދަހިކުރުމާއި ގުޅޭގޮތުން މަޝްވަރާކުރައްވަމުން ދެ ބޭފުޅުން ވަނީ ސާފް ޗެމްޕިއަންޝިޕް 2021 ގައި، މިއަދު މެންދުރުފަހުން ކުޅެން ހަމަޖެހިފައިވާ ދިވެހިރާއްޖެއާ ސްރީލަންކާގެ މެޗާއި މެދު ޝައުގުވެރިކަން ފާޅުކުރައްވާފައެވެ.
މިނިސްޓަރު ވަނީ މިފަހަރުގެ ސާފް ޗެންޕިއަންޝިޕް ދިވެހިރާއްޖޭގައި ބާއްވާތީ އެކަމާ އުފާކުރައްވާ ކަމަށް ވިދާޅުވެ، ދެޤައުމުގެ ދެމެދުގައި ކުޅިވަރުގެ ދާއިރާއިން އެއްބާރުލުން އިތުރުކުރުމާއި ގުޅޭގޮތުން ވާހަކަފުޅު ދައްކަވާފައެވެ. ހާއްސަކޮށް ފުޓްބޯޅަ އަދި ކްރިކެޓް ކުރިއެރުވުމަށް ކުރެވިދާނެ ކަންކަމާގުޅޭގޮތުން ދެބޭފުޅުން މަޝްވަރާކުރެއްވިއެވެ.
މީގެ އިތުރުން، މިއަހަރު ފަހުކޮޅު ގްލަސްގޯގައި ބޭއްވުމަށް ހަމަޖެހިފައިވާ ކޮޕް-26 ކޮންފަރެންސާ ގުޅޭގޮތުން ވެސް ދެބޭފުޅުން ވަނީ ވާހަކަފުޅު ދައްކަވާފައެވެ.
