ހެލްޓް މިނިސްޓްރީން މައުލޫމާތު ދީފައިވާ ގޮތުގައި، އިންޑީއާ ސަރުކާރުގެ ހިލޭ އެހީގެ ދަށުން ވެކްސިން ފޯރުކޮށްދީފައިވަނީ އެކަމަށް އެދުނުތާ 72 ގަޑި އިރުގެ ތެރޭގައެވެ.
އިންޑިއާއިން ރާއްޖެއަށް 30،000 ވެކްސިން ޑޯޒް ހަދިޔާކޮށްފައިވާއިރު، ޑަބްލިއުއެޗްއޯ އާއި ޔުނިސެފާއި ގުޅިގެން 200،000 ވެކްސިން ޑޯޒް ހޯދުމަށް ހެލްތް މިނިސްޓްރީން މަސައްކަތް ކުރަމުން އަންނަކަމަށް އެ މިނިސްޓްރީން މައުލޫމާތުދެއެވެ.
ހިމަބިއްސަށް ރާއްޖެއިން މިހާތަނަށް 79 މީހަކު ޓެސްޓް ކޮށްފައިވާއިރު ހަތަރު މީހަކު ވަނީ އެބައްޔަށް ޕޮޒިޓިވް ވެފައެވެ. އަދި މިހާތަނަށް 3189 މީހުން ވެކްސިން ޖަހާފައިވާ ކަމަށް ވެސް ހެލްތް މިނިސްޓްރީން މައުލޫމާތު ދީފައިވެއެވެ.
ރާއްޖެއިން ހިމަބި ނައްތާލާފައިވާތީ އެކަމުގެ ރަސްމީ ލިޔުން ދުނިޔޭގެ ސިއްހަތު ޖަމިއްޔާ އިން ދިވެހި ސަރުކާރާ ހަވާލުކޮށްފައިވަނީ 2017 ވަނަ އަހަރުގެ ސެޕްޓެމްބަރު މަހުގެ ހަތްވަނަ ދުވަހު އެވެ. ރާއްޖެއިން ހިމަބިހި ނައްތާލާފައިވާ ކަމަށް ޑަބްލިއުއެޗްއޯއިން ކަނޑައެޅީ 2009 ވަނަ އަހަރުން ފެށިގެން ހިމަބިހި ޖެހިފައިވާ މީހަކު ރާއްޖެއިން ފެނިފައި ނުވާތީ އެވެ.
ނަމަވެސް ރާއްޖޭގައި ހިމަބިހި ފެތުރެމުންދާ ކަމަށް ސަރުކާރުން މިމަހު 13 ވަނަ ދުވަހު ވަނީ ރަސްމީކޮށް އިއުލާނުކޮށްފައެވެ.
ހިމަބިއްސަކީ އެންމެ ފަސޭހައިން ގަޔަންގަޔަށް އަރާ އެއް ބައްޔެވެ. މި ބަލި ޖެހެނީ ނޭވާލާ ނިޒާމުގެ ތެރެއިންނެވެ. ހިމަބިހި ޖެހެނީ "މީސަލްސް ވައިރަސް" ގެ ސަބަބުންނެވެ.
އެޗްޕީއޭ އިން ވަނީ ހިމަބިހި ފަދަ ބަލިތަކުން ރައްކާތެރިވުމަށް ވެކްސިން ޖަހަން އޮންނަ މުއްދަތުގައި ވެކްސިންގެ ޑޯޒްތައް ފުރިހަމަ ކުރުމަށް ސަމާލުވުމަށް އިލްތިމާސްކޮށްފައެވެ.
