މޮސްޓާ މަޖިލީހުގެ ވަޓްސްއެޕް ގުރޫޕުން ބޭރުކޮށްލީ، މަތިވެރި ދާއިރާގެ މެންބަރު ހަސަން ޒަރީރުގެ މަންމައަށް ނިސްބަތްކޮށް މޮސްޓާ ވަރަށް ހަޑިހުތުރު ބަހުން ވާހަކަ ދެއްކުމާއި ގުޅިގެންނެވެ.
މިކަމާއި ގުޅިގެން މަޖިލީހުގެ ސެކްރެޓަރީ ޖެނެރަލް ފާތުމަތު ނިއުޝާ ވިދާޅުވީ، އެ ގުރޫޕަކީ މަޖިލީހުގެ މެމްބަރުންނަށް އިދާރީ ގޮތުން އަންގާ އެނގުންތައް އެނގުމަށް ހަދާފައިވާ ގުރޫޕެއް ކަމަށާއި، އެހެން ނަމަވެސް ގުރޫޕު ތެރޭ ބޭއަދަބީ ވާހަކަ ދައްކާ ގުރޫޕުގެ މަގްސަދާއި ހިލާފަށް މެމްބަރު ނަޝީދު ތަކުރާރުކޮށް އަމަލު ކުރަމުން އަންނަ ކަމަށެވެ.
މޮސްޓާގެ މި އަމަލުތަކުގެ ސަބަބުން ގިނަ މެމްބަރުން އޭނާ އެގުރޫޕުން ބޭރު ކުރަންވެސް އެދިފައި ވާކަމަށާއި، އެހެން ކަމުން މެމްބަރު ގުރޫޕުން ބޭރު ކުރަން ނިންމާފައި ވާކަމަށް ނިއުޝާ ވިދާޅުވިއެވެ. އެހެން ނަމަވެސް އިދާރީ ގޮތުން މެމްބަރަށް އަންގަންޖެހޭ އެންގުންތައް ވަކިން އަންގަމުން ގެންދާނެ ކަމަށް ނިއުޝާ ވަނީ ވިދާޅުވެފައެވެ.
މޮސްޓާ އަކީ މަޖިލީހުގެ ޖަލްސާ ތަކުގައިވެސް ބައެއް ފަހަރު ބައެއް މެމްބަރުންގެ ޒާތީ ކަންކަމުގެ ވާހަކަ ތަކުރާރުކޮށް ދައްކަވާ ބޭފުޅެކެވެ. އެކަމާއި ގުޅިގެން މަޖިލީހުގެ ރިޔާސަތުންވެސް ވަނީ އެކިފަހަރު މަތިން އެކަން ފާހަގަ ކޮށްފައެވެ.
