ޕަރިނީތީ ރާއްޖެ އައިސްފައިވަނީ ކޮންއިރަކުކަން ނޭނގުން ނަމަވެސް އޭނާ ވަނީ އިއްޔެގެ ވަގުތެއްގައި ރާއްޖޭގައި ޗުއްޓީ ހޭދަކުރަމުންދާކަން އިންސްޓަގްރާމު މެދުވެރިކޮށް ހިއްސާކޮށްފަ އެވެ.
އުމުރުން 31 އަހަރުގެ ޕަރިނީތީ ޗުއްޓީ ހޭދަކުރަމުން ދަނީ ގިލިލަންކަންފުށި ރިސޯޓުގަ އެވެ. އެގޮތުން ރިސޯޓުގެ މެހެމާންދާރީ ވަރަށް ފުރިހަމަ ކަމަށް ބުނެ އޭނާ ވަނީ ރިސޯޓަށް ވެސް ވަރަށް ތައުރީފްކޮށްފަ އެވެ.
މަޝްހޫރު ބެޑްމެންޓަން ކުޅުންތެރިޔާ ސައިނާ ނެހްވާލްގެ ހަޔާތަށް ނެރޭ ފިލްމުގެ މަސައްކަތުގައި ޕަރިނީތީ އަވަދިނެތި އުޅެމަށް ފަހު ކުޑަ ޗުއްޓީއަކަށް ރާއްޖެ އައިސްފައިވާއިރު އޭނާ ރާއްޖެ އައީ ކޮން ބަޔަކާއެކުކަން ސާފެއް ނުވެ އެވެ.
އެންމެ ފަހުން ޕަރިނީތީގެ މަސައްކަތަށް ފެނިގެންދިޔައީ ޕްރަޝަންތު ސިން ޑައިރެކްޓްކޮށް ނެރުނު ފިލްމު، ޖަބަރިޔާ ޖޯޅީއިންނެވެ. އެފިލްމުގައި އޭނާއާއެކު ލީޑުން ފެނިގެންދިޔައީ ސިދާތު މަލްހޯތުރާ އެވެ.
