އެމަނިކުފާނު މިހެން ވިދާޅުވެފައި މިވަނީ، މިއަދު ހެނދުނު ރައްޔިތުންގެ މަޖިލީހުގެ ޖަލްސާގައި މިއަހަރުގެ ރިޔާސީ ބަޔާން އިއްވަވަމުން ދެއްކެވި ވާހަކަފުޅުގައެވެ.
އެމަނިކުފާނުގެ ވާހަކަފުޅުގައި ވިދާޅުވީ، ސަރުކާރުގެ އަމާޒަކީ ކުރިއަށް ހުރި ދުވަސްވަރުގައި ރާއްޖޭގައި ކުދި ވިޔަފާރިވެރިންނަށް ތަނަވަސް ފުރުސަތުތަކެއް ފަހި ކޮށްދިނުން ކަމަށާއި، މިހާރުވެސް ސަރުކާރުން ކުދި އަދި މެދު ފަންތީގެ ވިޔަފާރިތަކަށް އެހީތެރިކަން ފޯރު ކޮށްދެއްމުން އަންނަ ކަމަށެވެ.
މި މޭރުމުން ވާހަކަފުޅު ދައްކަވަމުން ރައީސް އިތުރަށް ވިދާޅުވީ، ސަރުކާރުން ތައާރަފް ކޮށްފައިވާ އެސްއެމްއީ ބޭންކުގެ ސަބަބުން އެތައް ބަޔަކަށް އޭގެ މަންފާ ކުރަމުން ދާކަމަށެވެ. މީގެ އިތުރުން އެމަނިކުފާނު ވިދާޅުވީ، މިހާތަނަށް 741 ވިޔަފާރިއަކަށް 739 މިލިއަން ރުފިޔާގެ ލޯންއެހީ ދޫކުރެވިފައި ވާކަމަށެވެ. އެއީ ރާއްޖޭގެ ހުރިހާ އަތޮޅެއް ހިމެނޭހެން 144 ރަށެއްގާ ކުދި ވިޔަފާރި ހިންގޭނެ ގޮތުން ދޫކުރި ލޯން އެހީތަކެއް ކަމަށްވެސް އެމަނިކުފާނު ވިދާޅުވިއެވެ.
