މަސްތުވާތަކެތީގެ މައްސަލައަކާއި ގުޅިގެން ޝަރީއަތް ނިމެންދެން ހައްޔަރުކޮށްފައިވާ އައްޑޫ ސިޓީ ހިތަދޫ މަންދޫބުގެ، ރުޝާން އަހުމަދު ދީދީ ދޫކޮށްލުމަށް އައްޑޫ ސިޓީ ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީއުއްދީން އަހުމަދު ނެރުނު އަމުރުގައި ބުނެފައިވަނީ، އޭނާ ދޫކޮށްލުމަށް ހުކުމް ކުރީ، އޭނާގެ ބަލި ހާލަތު ހުރި ގޮތުގެ ސަބަބުން ކަމަށެވެ.
ރުޝާން ދޫކޮށްލުމަށް މެޖިސްޓްރޭޓް ކޯޓުން ހުކުމް ކުރިނަމަވެސް، މަތީ ކޯޓަކުން ނެރޭ އެއްވެސް އަމުރެއް ބާތިލް ކުރުމުގެ އިހުތިޔާރު ދަށު ކޯޓަކަށް ލިބިފައި ނުވެއެވެ. އަދި މަތީ ކޯޓުތަކުން ނިންމާ ކޮންމެ ނިންމުމަކަށް ދަށު ކޯޓުތަކުން ތަބާ ވާންޖެހޭނެ ކަމަށްވެސް ގާނުނުގައި ބުނެފައިވެއެވެ.
މި އަމުރާއި ގުޅިގެން ކަންބޮޑުވުން ފާޅު ކުރައްވަމުން ޕްރޮސެކިއުޓާ ޖެނެރަލް ހުސެން ޝަމީމް ވިދާޅުވީ ހައި ކޯޓުގެ ހުކުމެއް ދިރި އޮއްވައި އެ ހުކުމް ސަސްޕެންޑުކުރުމަކީ ދަށު ކޯޓަކުން މެޖިސްޓްރޭޓަކު ކުރާ ކަހަލަ ކަމެއް ނޫން ކަމަށެވެ.
އަދި މީހަކު ދޫކޮށްލަން ބޭނުން ނަމަ އެކަމަށް އެކަށީގެންވާ ސަބަބެއް ދައްކަން ޖެހޭނެ ކަމަށާއި، މިގޮތަށް ނިންމާ މައްސަލަ ހައިކޯޓުގައި އިސްތިއުނާފް ކޮށް ޖޭއެސްސީއަށް ޝަކުވާ ހުށައަޅާނެ ކަމަށް ޝަމީމް ވިދާޅުވިއެވެ.
