ތިނަދޫގައި ހުންނަ މޯލްޑިވްސް ނޭޝަނަލް ޔުނިވާސިޓީ ކެޕްމަހުގައި އޮތް މި އަޑުއެހުންތަކުގައި އެންމެ ފުރަތަމަ ބަޔާން ދީފައިވަނީ އެ ދުވަހު ސީދާ އަނިޔާ ލިބުނު މީހެއްގެ ހައިސިއްޔަތުން، ތިނަދޫގެ ރައްޔިތެއް ކަމަށްވާ އާދަމް ހުސެއިން އެވެ.
އާދަމް ހުސެއިން އެ ދުވަހުގެ ވާހަކަތައް ހިއްސާކުރަން ފަށަމުން ބުނެފައިވަނީ އޭރު އޭނާގެ އުމުރުން ތިން އަަހަރު ކަމަށާއި، އޭރު އޭނާ އާއި އެއްބަފާ އިތުރު ތިން ކުދިން ތިބި ކަމަށެވެ. ނަމަވެސް އެދުވަހުގެ އެ ބިރުވެރި ހާދިސާއަށްފަހު މަންމަ އަށް ސަލާމަތް ކުރެވުނީ އޭނާ އެކަނި ކަމަށެވެ.
އާދަމް ހުސެއިން ކިޔައިދިން ގޮތުން، އޭނާގެ ކޮއްކޮއާއި، ބޭބެ އާއި ދައްތަ ވެސް އެ ހާދިސާގައި މަރުވެދިޔައީއެވެ. ރަށުން ބޭލީ ވަރަށް ވިއްސާރަ ރެއަކު ކަމަށާއި، ނަމަވެސް އުމުރުގެ ހަގު ކަމުން އެ އިހުސާސްތައް އޭރު ނުކުރެވޭ ކަަމަށެވެ. ރަށުން ބޭލުމުން މަންމަ ކުދިންތައް ގޮވައިގެން ދިޔައީ ފުރަތަމަ ކާޑެއްދޫ އަށް ކަމަށާއި، ކާޑެއްދޫއިން ދެން ދިޔައީ މަޑަވެއްޔަށް ކަމަށެވެ. މަޑަވެލީގައި އާއިލާ މީހުން ތިއްބަސް ނަފްސާނީ ގޮތުންނާއި ޖިސްމާނީ ގޮތުންވެސް އެންމެންނަށްވެސް އަނިޔާވެފައިވާތީ އެ ދުވަހު ތިބީ އެކަކު އަނެކަކަށް އެހީތެރެވެވޭ ހާލަތެއްގައި ނޫން ކަމަށް އޭނާ ބުންޏެވެ.
އާދަމް ހުސެއިން ބުނީ، ރަށުން ބޭލުމަށްފަހު އެމީހުންގެ ގެވެސް ވަނީ ހުޅުޖަހައި އަންދާލާފައި ކަމަށެވެ. އަދި ރަށުން ބޭލުމަށްފަހު ރަށުގެ ރައްޔިތުން އަޅާލީ ކަނޑަށް ކަމަށް އޭނާ ބުންޏެވެ. އެހެންކަމުން އެ ހާދިސާގައި މަރުވި މީހުންގެ ތެރެއިން ގިނަ ބަޔަކީ ކަނޑުވެގެންނާއި، ބަނޑަށް ޖެހިގެން މަރުވި މީހުން ކަމަށް ވެސް އޭނާ ބުންޏެވެ.
އާދަމް ހުސެއިންނާއި އެއްބަނޑު އެހެން ކުދިންނާއިއެކު މަންމަވެސް ކަނޑަށް ދޫކޮށްލި ކަން ފާހަގަކުރަމުން އާދަމް ބުނީ އޭނާ ސަލާމަތް ކުރަން ހަދައިގެން އޭނާގެ މަންމަވެސް ކަނޑުވެ މަރުވެގެން ނުދިޔައީ ހަމަ ކިރިޔާ ކަމަށެވެ.
މަޑަވެއްޔަށް ގޮސް އެރަށުގައި އުޅުނު ނިކަމެތި ހާލުގެ ވާހަކަ ކިޔައިދެމުން އޭނާ ބުނީ، ކާއެތިކޮޅު ހޯދަން އޭނާ ގޮވައިގެން ދައްތަ އެއްގޭ ދޮށުން އަނެއް ގޭ ދޮށަށް ހިނގާ ހަނދާން ހުންނަ ކަމަށެވެ. އަތުގައި ޖެހުނު ނާށިގަނޑެއް ވިއްޔާ ހިފައިގެން ގޭގެ ދޮށަށް ގޮސް ސަލާން ޖަހައިގެން ކައި އުޅުނު ކަމަށާއި، ގޭގެ ދޮށަށް ގޮސް ބުނަނީ "ލޮނު ފޮދެއް ދޭށޭ" ކަމަށެވެ. އެއީ ތިނަދޫ ބަހުން ގަރުދިޔަ ފޮދެއް ދިނުމަށް ބުނެ އުޅޭ ގޮތެވެ.
އެ ގަރުދިޔަ ނާށި ހިފައިގެން ދަނީ މަޑަވެލި ރުއްގަނޑު ދޮށަށް ކަމަށާއި، އެތަނަށް ގޮސް ރުއްދޮށުން ގޮބޮޅި ހޮވާ ކަމަށެވެ. އެ ވެސް ނުފެނިއްޖެނަމަ މީދާ ކައިފައި ހުންނަ "ކޮވި" ނަގައިގެން ދައްތަގެ އަގައިން ޗިސްޗިސް ކޮށްފައި ގަރުދިޔަ ނާށިތެރެއަށް ލާފައި އާދަމްގެ އަގަޔަށް ލަވާ ކަމަށް އާދަމް ކިޔައިދިނެވެ.
އާދަމް ބުނީ އެކަމުގައި އޭނަގެ އާއިލާގެ އޮތް ކުށަކީ ކޮބައިތޯ ބަލަން ބޭނުންވާ ކަމަށެވެ. ރަސޫލާގެ ހަދީސްތަކުންނާއު ގުރުއާނުންވެސް އެގޭގޮތުގައި ހަނގުރާމަ ކުރިއަސް ކުޑަކުދިންނާއި، މުސްކުޅިންނާއި، އަންހެނުން ނުމެރުމަށް އަދި އަނިޔާ ނުދިނުމަށް އޮންނަ ކަމަށެވެ. އެހެންކަމަށް ވާއިރު، އޭރު ވެރިއަކަށް ހުންނެވި ނާސިރަކީ އިސްލާމެއް ނަމަ ގުރުއާނާއި ހަދީސްތަކަށް އަމަލުކުރައްވާނެ ކަމަށާއި، ނާސިރަކީ އިސްލާމެއް ކަމަށް ގަބޫލު ނުކުރާ ކަމަށެވެ.
އަދި އޭނާއާއި އޭނާގެ އާއިލާއަށް ލިބުނު އަނިޔާތަކަށް ދުވަަހަކުވެސް ނާސިރަށް މައާފު ނުކުރާނެ ކަމަށް އޭނާ ބުންޏެވެ. އަދި އެ ޝަކުވާ މާތްﷲގެ ހަޒްރަތުގައި ކުރައްވާނެ ކަމަށް އޭނާ ބުންޏެވެ.
