އިދިކޮޅު ކޯލިޝަނުން ހިންގާ އިންޑިއާ އައުޓު ހަރަކާތާއި ދެކޮޅަށް ރައްޔިތުންގެ މަޖިލީހުގެ މިއަދުގެ ޖަލްސާގައި ހުށަހެޅި ކުއްލި މައްސަލައާއި ބެހޭ ގޮތުން ވާހަކަ ދައްކަވަމުން މޮސްޓާ ވިދާޅުވީ ހޮޅިން ވިޔަސް, އަނދިރި އަނދިރިން ވިޔަސް, މަލާބާރީން ވިޔަސް, ކޮންމެ ބައެއް ވިޔަސް މި ގައުމުގެ ދާޚިލީ ކަންތަކާއި މިނިވަންކަން ގެއްލެނީ އިންޑިއާގެ ސަބަބުން ކަމަށެވެ.
މޮސްޓާ ވިދާޅުވީ އިންޑިއާ އައުޓް ކިޔަނީ އިންޑިއާ ސިފައިން މިތާ ތިބުމުން ކަމަށާއި, އިންޑިއާ ޑޮކްޓަރުންނާއި, ނަރުހުންނާއި, ޓީޗަރުން ތިބީމަކާ ނޫން ކަމަށެވެ.
މީގެ އިތުރުން މޮސްޓާ ވިދާޅުވީ އިންޑިއާ އައުޓް ހަރަކާތާއި ޑްރަގާއި ގުޅުވައި ބައެއް މެންބަރުން ވާހަކަދައްކަނީ ރައްޔިތުންނަށް އޮޅުވާލަން ކަމަށެވެ.
އިންޑިއާ އައުޓު ހަރަކާތާއި ދެކޮޅަށް މަޖިލީހަށް ކުއްލި މައްސަލައެއް ހުށަހަޅާފައިވާއިރު, އިދިކޮޅު ކޯލިޝަނުން އަންނަ ހުުކުރު ދުވަހު ބާއްވަން ތައްޔާރުވަމުންދާ ހަރަކާތް ނުބޭއްވޭނެ ކަން ފުލުހުން ވަނީ އަންގާފައެވެ.
ނަމަވެސް އިދިކޮޅު ކޯލިޝަނުން ވަނީ ހަރަކާތް ކުރިއަށް ގެންދާނެކަމަށް ވިދާޅުވެފައެވެ.
