މިއަދު މާލޭގެ މަސްމާރުކޭޓުގައި ކަނޑުމަސް ކިލޯއެއް ލިބެން ހުރީ، 55 ރުފިޔާއިން ފެށިގެން 75 ރުފިޔާއާއި ދެމެދުގެ އަގުތަކެއްގައެވެ. ތާޒާ ކަންނެލި ކިލޯއެއް ލިބެން ހުރީ 75 ރުފިޔާއިން ފެށިގެން 85 ރުފިޔާއާއި ދެމެދުގެ އަގުތަކެއްގައެވެ. މީގެ އިތުރުން ފަރުމަސް ކިލޯއެއް ހުރީ އާދައިގެ މީހަކަށް ގަނެލެވޭވަރަށް ވުރެ މާމަތީގައެވެ.
މިކަމާއި ގުޅިގެން ގިނަ ރައްޔިތުންނެއް މަސްވެރިންނަށް ފާޑުކިޔަމުން ދާއިރު މިއީ ރޯދަ މަހާއި ދިމާކޮށް މަސްވެރިން ގަސްތުގައި ކުރަމުން އަންނަ ކަމެއް ކަމަށްވެސް ބައެއް ފަރާތްތަކުން އަންނަނީ ބުނަމުންނެވެ.
މިކަމާއި ގުޅިގެން "ސީއެންއެމް" އާއި ވާހަކަ ދެއްކި މަސްމާރުކޭޓުގައި މަސްވިއްކަމުން އަންނަ ފަރާތަކުން ބުނީ ފަހަކަށް އައިސް ތެޔޮ ގަންނަން ލިބޭ އަގު ބޮޑުވެފައި ވުމުން ވިއްކަމުން އަންނަ މަހުގެ އަގުވެސް ބޮޑުކުރަން ޖެހިފައި ވާކަމަށާއި، މިއީ ރޯދަ މަހާއި ދިމާކޮށް ގެނައި ބަދަލެއް ނޫން ކަމަށެވެ. އަދި މިކަމާއި ގުޅިގެން ސަރުކާރާއި މަޝްވަރާ ކުރުމަށް ނިންމާފައި ވާކަމަށްވެސް އެފަރާތުން ވަނީ ބުނެފައެވެ.
މީގެ އިތުރުން އެފަރާތުން ބުނީ، މިހާރުވެސް ބައެއް މަސްވެރިން ނުއަގުގައި މަސް ވިއްކަން މަޝްވަރާ ކުރަމުން އަންނަ ކަމަށާއި، އެކަމުގެ ބޭނުމަކީ މި ރޯދަ މަހު ރައްޔިތުންނަށް ހެޔޮ އަގުގައި މަސް ގަތުމުގެ ފުރުސަތު ފަހި ކޮށްދިނުމުގެ ބޭނުމުގައި ކަމަށެވެ.
ރޯދަ މަހާއި ދިމާކޮށް އާއްމު ގޮތެއްގައި މާލޭގެ ބާޒާރުގައި ތަކެތީގެ އަގުތައް އުފުލެއެވެ. އެހެން ނަމަވެސް މި އަހަރުގެ ރޯދަ މަހާއި ދިވެހިން ބައްދަލުކުރި އިރު، ތަކެތީގެ އަގި މިވަނީ އިންތިހާ ދަރަޖައަށް މައްޗަށް އުފުލިފައިކަން ފާހަގަ ކޮށްލެވެއެވެ.
