"ސީއެންއެމް"އާއި ވާހަކަދައްކި އަބޫބަކުރުގެ ގާތް ރައްޓައްސަކު ބުނީ އާއިލާގެ އެންމެންނާއި، ދަރިން ގޮވައިގެން އުމުރާއަކަށް ދިއުމަށް ބަކުރު އަބަދުވެސް މަސައްކަތް ކުރާ ކަމަށެވެ.
އަބޫބަކުރު އުމްރާގައި--
މީގެ ކުރިން ހަތަރު އުމްރާއެއް ފުރިހަމަ ކުރި އަބޫބަކުރު މިފަހަރު މުސާފިރީން ގުރޫޕާއެކު އުމްރާއަށް ގޮސްފައިވަނީ އަންހެނުންނާއި ބައެއް ދަރިންނާއި، ކާފަދަރިއަކުވެސް ގޮވައިގެންނެވެ. މިމަހުގެ 17 ވަނަ ދުވަހު އުމްރާއަށް އެ އާއިލާ ފުރީ ގާތްގަނޑަކަށް ދަރިންނާއި އާއިލާގެ މީހުންނާއެކު 17 ވަރަކަށް މީހުންގެ ޓީމަކާއި އެކެވެ.
އުމްރާގެ އަޅުކަން ފުރިހަމަކޮށް ނިމިފައިވަނިކޮށް އަބޫބަކުރު ނިޔާވެފައިވަނީ ރޭ ފަތިސް ނަމާދަށް ފަހު ކުއްލިއަކަށް މެޔަށް ތަދެއް އަރައިގެން ހޮސްޕިޓަލަށް ގެންދަން އުޅެނިކޮށެވެ. އުމްރާ ފުރިހަމަކުރުމަށްފަހު އަރާމު ނިންޖަކުން އަބަދުގެ އަބަދަށް ނިދީއެވެ. ހާދަ އުފާވެރި ނިމުމެކެވެ. ދިގުދެމިގެންވާ ސަދަގާތާއެކު އަބޫބަކުރުގެ ކަށްވަޅު އަމާން ކަން ލިބިގެންވާ ފިނި ތަނެއްކަމުގައި ލައްވާންދޭވެ. އާމީން.
