އޭރު ކުރި އެކި ޓެސްޓުތަކުން އެގުނުގޮތުގައި ދަރިފުޅު ބައިގެންދިޔައީ ރަހިމުގައި އުފެދި ބޮޑުވަމުންދާ ސިސްޓެއްގެ ސަބަބުންނެވެ. އެކަމަށްޓަކައި އެދެމަފިރިން ދަނީ ފަރުވާވެސް ކުރަމުންނެވެ.
ދެވަނަ ދަރިއެއްގެ އުފާވެރި ހަބަރު ލިބުނީ ކައިވެންޏަށް ދެ އަހަރުވީފަހުންނެވެ. މިފަހަރުވެސް ކުއްޖާ ބައިގެން ގޮސްދާނެކަމަށް އެންމެ ފުރަތަމަވެސް ޑޮކްޓަރު ލަފާދެއްވިއެވެ.
ބަނޑަށް ތިން ހަފްތާގައި ލޭ ފައިބާތީ އަނެއްކާވެސް އަނބިމީހާ ގޮވައިގެން އެމަޖެންސީގައި ހޮސްޕިޓަލަށް ދާންޖެހުނެވެ. މާލޭގައި ހުރި އެންމެ ބޮޑު ގިނަ ބަޔަކު ހިދުމަތް ހޯދަމުންދާ ހޮސްޕިޓަލަށް ގޮސް ދެއްކުމުން ދިނީ ދަރިފުޅު ބައިގެންދިޔަ ކަމުގެ ހިތާމަވެރި ހަބަރެވެ. އެފަދަ ކަމަކަށް ލަފާކުރެވިފައި އޮތުމުން އެއީ ލިބުނު ސިހުމެއް ނޫނަސް، ހިތާމަވެރި ހަބަރެކެވެ.
ބައިގެންދިޔަކަމަށް ޑޮކްޓަރު ވިދާޅުވުމުން ދެން އޮތީ ބަނޑުދޮވުމުގެ ކަންކަން ކުރުމެވެ.
ބަނޑުދޮވުނުތާ ދެ ހަފްތާ ވީއިރު، އަނބިމީހާއަށް އޭނާ އަދިވެސް ބަނޑުބޮޑުކަމަށް އޮތް ޝައްކު ފިލައިގެނެއް ނުދިޔައެވެ. އެހެންކަމުން ޓެސްޓުކިޓަކުން ޓެސްޓުކުރަން އަނބިމީހާ ބޭނުންވީއެވެ. ނަތީޖާ ނިކުތީ ޕޮޒިޓިވްވެގެންނެވެ.
އަނެއްދުވަހު ހޮސްޕިޓަލަށް ގޮސް ޓެސްޓުކުރިއިރުވެސް ދެއްކީ ބަނޑުބޮޑު ކަމަށެވެ.
ހޮސްޕިޓަލަށް އިތުބާރު ނެތުމުން ފަހުން ދެން އެދެމަފިރިން ދެއްކީ ކްލިނިކަކަށެވެ. އެތަނުން ހެދި ސްކޭނުން އެގުނުގޮތުގައި ބަނޑަށް އޭރު ދެމަސްވެއްޖެ އެވެ.
އިތުރަށް ހެދި ޓެސްޓުތަކުން އެގުނީ ރަހިމުގެ މަތީގައި އުފެދިފައިވާ ފައިބްރިޑެއް އިންކަމެވެ. ނަމަވެސް މިފަހަރު ވަރަށް ކުޑައެވެ. އެހެންކަމުން ދަރިފުޅަށް އެއްވެސް ނުރައްކަލެއް ނެތްކަމަށާއި، ދަރިފުޅު ރަނގަޅުކަމަށް ފަހުން ދެއްކި ޑޮކްޓަރުން ބުންޏެވެ.
އޭނާގެ އަންހެނުން ބަނޑަށް މިހާރު ތިން މަހެވެ. ގަވާއިދުން ޑޮކްޓަރަށް ދައްކަމުން ދަނީ ބަލަމުންނެވެ.
އެދަމަފިރިން މިހާރު ދަނީ އިތުރު ޓެސްޓުތަކެއް ވެސް ހައްދާ، ޑޮކްޓަރުގެ ލަފާގެމަތިން ކުއްޖާ އުފަންވާއިރު އެއްވެސް އުނިކަމެއް ހުންނާނެތޯވެސް ބަލަމުންނެވެ.
ޒުވާން މި ދެމަފިރިންގެ އުންމީދަކީ ދެ އަހަރުގެ ދިގު އިންތިޒާރަށްފަހު ލިބުނު އަލަތު ދަރިފުޅު ދުޅަ ހެޔޮ ސިއްހަތެއްގައި އެދެމަފިރިންނާއި ބައްދަލުކުރުމެވެ.
ނޭނގުމެއްގެ ތެރޭގައި އަތުން ބީވެ ނުދިޔައީވެސް ކިރިޔާއެވެ. އެދެމަފިރިންގެ ދުއާއަކީ އެފަދަ ދުވަހެއް ނައުމެވެ.
މިއީ ދާދިފަހުން ހިނގައިދިޔަ ހާދިސާއެކެވެ. މި އާޓިކަލަށް މައުލޫމާތު ހިއްސާކުރި ދެމަފިރިން ހޮސްްޕިޓަލުގެ ނަން ހާމަކުރާކަށް ބޭނުމެއް ނުވެއެވެ. އެއީ ދެންވެސް ބޮޑު ބައްޔެއްވެއްޖެނަމަ ދާންއޮތްތަނަކީ އެއީ ކަމަށް ވުމުންނެވެ.
ރާއްޖޭގައި ކޮންމެ ދުވަހަކު ކަހަލަ ގޮތަކަށް ސިއްހީ ނިޒާމުގެ ކަޑަކަމުން ނުވަތަ ފަރުވާކުޑަކަމުން އެތައް ބަޔަކަށް މިފަދަ ގެެއްލުންތައް ދަނީ ލިބެމުންނެވެ.
މިއީ މިފަދަ ކުރިއަރާފައިވާ އީޖާދީ ތަރައްގީއާއެކު ވެސް ރާއްޖޭގެ ސިއްހީ ނިޒާމު ހީނަރުވެފައިވާ ކަން ދައްކުވާދޭ ހިތާމަވެރި މަންޒަރުތަކާއި އަޑުތަކެވެ.
ސިއްހީ ނިޒާމަކީ އަސާސީ ހައްގެެއް ކަމަަށްވާއިރު، ކޮންމެ ފަހަރަކު މިފަދަ ކަމެެއް ދިމާވުމުން “ސޮރީ” އަކުން ނުވަތަ “އޮޅުމަކުން” ނިންމާ ލެވޭ ވަރަށްވުރެ މިއީ ސީރިއަސް މައްސަލައެކެވެ.
