މިއަހަރުގެ ރިޔާސީ ބަޔާން އިއްވަވަމުން ފެބްރުއަރީ މަހުގެ ތިން ވަނަ ދުވަހު ރައީސް ސޯލިހު ވިދާޅުވީ، ތައުލީމީ ދާއިރާގެ ހުރިހާ މުވައްޒަފުންގެ މުސާރަ މޭ މަހުން ފެށިގެން ބޮޑުކުރަން ނިންމާފައި ވާކަމަށެވެ.
އެމަނިކުފާނުގެ ވާހަކަފުޅުގައި ވިދާޅުވީ ގައުމު ބިނާ ކުރުމުގެ އެންމެ މުހިއްމު އަދި އެންމެ ބުރަ މަސްއޫލިއްޔަރު އަދާ ކުރަމުންދަނީ ޓީޗަރުން ކަމަށާއި، ޓީޗަރުންގެ އުޖޫރަ ބޮޑުކޮށްދިނުމަކީ އެމަނިކުފާނުގެ ވައުދެއް ކަމަށެވެ. އަދި އެވައުދު މި އަހަރު ތެރޭ ފުދިގެން ދާނެ ކަމަށް އެމަނިކުފާނު ވިދާޅުވިއެވެ.
"ސީއެންއެމް" އަށް މައުލޫމާތު ދެމުން އެޑިއުކޭޝަން މިނިސްޓްރީގެ އިސް އޮފިޝަލަކު ވިދާޅުވީ، ޓީޗަރުންގެ މުސާރައިގެ އާ އޮނިގަނޑު މާދަމާ ރައީސް އިއުލާން ކުރައްވަން ނިންމަވާފައި ވާކަމަށެވެ. އަދި އެކަމުގެ ތަފްސީލްތައް މާދަމާ އެމަނިކުފާނު ހިއްސާ ކުރައްވާނެ ކަމަށް އޮފިޝަލް ވިދާޅުވިއެވެ.
ތައުލީމީ ދާއިރާގައި މަސައްކަތް ކުރާ ފަރާތްތަކުގެ މުސާރަ ބޮޑުކުރަން ނިންމާފައި ވާއިރު، ގިނަ ޓީޗަރުންގެ ކަންބޮޑުވުމަކީ މިހާރު އޮންނަ އޮނިގަނޑުގެ ސަބަބުން އެއްވެސް އިންސާފުވެރިކަމެއް ނެތް ކަމެވެ.
އެގޮތުން ބައެއް ޓީޗަރުން ބުނި ގޮތުގައި، މިހާރު އޮންނަ އުސޫލަށް ބަލާއިރު، ސުކޫލަށް ނައިސް ސަލާމުގައި ތިބޭ ޓީޗަރުންނާއި، ގަވައިދުން ސްކޫލަށް އައިސް ދަރިވަރުންނަށް ކިޔަވައިދިނުމުގައި އުޅޭ ޓީޗަރުންނަށް ލިބެނީ ހަމަހަމަ މުސާރައެއް ކަމަށެވެ. އަދި މިކަމުގެ ސަބަބުން ބައެއް ފަހަރު މާޔޫސްވާކަމަށް ބައެއް ޓީޗަރުން ވަނީ ބުނެފައެވެ.
މީގެ އިތުރުން ބައެއް ޓީޗަރުން ބުނީ، ސްކޫލުގެ އިސްވެރިންނާއި ހާއްސަ ގުޅުން އޮންނަ ޓީޗަރުންނަށް ސްކޫލު ތެރޭ ކަންކަން ކުރަން ފަސޭހަވެގެން ދާ ކަމަށެވެ. އަދި މިކަމުގެ ސަބަބުން ވެސް ބައެއް ޓީޗަރުން ނާޖާއިޒް ފައިދާ ނަގާކަމަށް އެފަރާތުން ވަނީ ބުނެފައެވެ.
