ލަންކާގައި ހަމަނުޖެހުން ބޮޑުުވުމުގެ ސަބަބުން ބޮޑުވަޒީރު މަހިންދަ ރާޖަޕަކްސަ އިއްޔެ ވަނީ އިސްތިއުފާ ދެއްވާފައެވެ. އަދި އަންނަ ބުދަ ދުވަހާއި ހަމައަށް އެގައުމުގައި ވަނީ ކާފިއު އިއުލާން ކޮށްފައެވެ.
ހަމަނުޖެހުންތަކުގެ ތެރޭގައި ގާނޫނު ހަދާ މަޖިލީހުގެ މެންބަރު އަމަރަކީތީ އަތުކޮރަލާ ވަނީ އަމިއްލައަށް މަރުވެފައެވެ. މިހާތަނަށް މި ހަމަނުޖެހުން ތަކުގައި އަށް މީހުން މަރުވެފައި ވާކަން ކަށަވަރު ކުރެވިފައި ވާއިރު، އޭގެ ތެރޭ އުމުރުން 24 އަހަރުގެ ފުލުސް އޮފިސަރެއްވެސް ހިމެނެ އެވެ.
އެގައުމުގައި ހިނގަމުން އަންނަ ހަމަނުޖެހުން ތަކުގައި 217 އަށްވުރެ ގިނަ މީހުންނަށް އެކިވަރުގެ އަނިޔާތައް ވެގެން ހޮސްޕިޓަލުގައި ފަރުވާ ދެމުން އަންނައިރު، ބައެއް މީހުންގެ ހާލު ސީރިއަސް ކަމުން މަރުވާ މީހުންގެ އަދަދު އިތުރުވުމަކީ އެކަށީގެން ވާކަމެއް ކަމަށްވެސް ވަނީ ލަފާކޮށްފައެވެ.
ގިނަ އަދަދެއްގެ ސިޔާސީ ފަރާތްތަކުން ބުނަނީ އެ ހަމަނުޖެހުންތައް ބޮޑުވެފައިވަނީ، ހަމަހިމޭން އިހުތިޖާޖެއް ކުރަމުންދަނިކޮށް މަހިންދައަށް ތާއީދުކުރާ މީހުން، ގޯލް ފޭސް ތެރެއަށް ވަދެ ހަމަނުޖެހުން ހިންގާ އެތަނަށް އެއްވެ ތިބި ހަމަހިމޭންކަންމަތީ މުޒާހަރާ ކުރަމުންދިޔަ މީހުންނަށް ހަމަލާދިނުމުން ކަމަށެވެ. ވެރިކަން ކުރާ ޕާޓީ، ސްރީ ލަންކާ ޕޮޑުޖަނާ ޕެރަމުނާ (އެސްއެލްޕީޕީ)ގެ މެމްބަރުން މުޒާހަރާގެ ތެރެއަށް ވަދެގަންނަން ހިތްވަރު ދެއްވީ މަހިންދަ ކަމަށާއި އެކަން އެގޮތަށް ކުރަން ޖެހޭ ސަބަބެއް ނެތްކަމަށްވެސް އެފަރާތްތަކުން ދަނީ ބުނަމުންނެވެ.
އޭގެފަހުން ހިގައިދިޔަ ހަމަނުޖެހުންތަކުގައި އެތައް ބަޔަަކަށް އަނިޔާވެ، އަށް މީހުން މަރުވެ، ގައުމު ބިރުވެރިކަމަކަށް ވެއްޓިފައިވަނީ މަހިންދަގެ ސަބަބުން ކަމަށް ވާތީ ވަގުތުން ވަގުތަށް މަހިންދަ ހައްޔަރުކޮށް އެ ކަން ތަހުގީގު ކުރުމަށް ވެސް ދަނީ ގޮވާލަމުންނެވެ.
މަހިންދަ ހައްޔަރުކުރުމަށް ގޮވާލި މީހުންގެ ތެރޭގައި ގާނޫނު ހަދާ މަޖިލީހުގައި ޓެމިލް ނޭޝަނަލް އެލަޔަންސް ތަމްސީލް ކުރައްވާ މެމްބަރެއް ކަމަށްވާ އެމްއޭ ސުމަންތިރަން އާއި، އެ ގައުމުގެ ކުރީގެ ރައީސް މައިތިރިޕާލަ ސިރިސޭނާގެ އިތުރުން އިދިކޮޅު މައި ޕާޓީ ސަމާގި ޖާނާ ބަލަވެގަޔާގެ ލީޑަރު ރަންޖިތު މަޑުއްމާ ބަންޑާރަ ހިމެނެއެވެ.
ސިރިސޭނާ ވިދާޅުވީ، ހަމަނުޖެހުންތައް ހިންގަން ހިތްވަރު ދެއްވުމުން މަހިންދަ ހައްޔަރުކުރަން ޖެހޭ ކަމަށެވެ. އަދި މުޒާހަރާގެ ބައިވެރިންނަށް ހަމަލާދިނުމުގެ ބޭނުމެއް ނުވެސް ނެތްކަމަށެވެ.
ލަންކާގެ ހާލަތު ގޯސްވެ އެގައުމުގެ މިނިސްޓަރުންނާއި ކުރީގެ މިނިސްޓަރުން ހިމެނޭހެން 27 މީހެއްގެ ގޭގައި މުޒާހަރާގެ ބައިވެރިން ވަނީ ހުޅުޖަހާ ބޭނުން ނުކުރެވޭ ވަރަށް އަންދާލާފައެވެ. މީގެ އިތުރުން ސަރުކާރަށް ތާއީދު ކުރާ މަޖިލިސް މެމްބަރުންގެ ގެ ތަކުގައިވެސް މުޒާހަރާ ކުރާ ފަރާތްތަކުން އަންނަނީ ހުޅު ޖަހަމުންނެވެ.
ސަރުކާރު އޮފީސްތަކާއި، ވެހިކަލްތަކުގައިވެސް މުޒާހަރާ ކުރާ ފަރާތްތަކުން ރޯކުރަމުން އަންނައިރު، މަހިންދަގެ ދެ ގެއެއްވެސް އެއްކޮށް ވަނީ އަންދާލާފައެވެ.
