އެމްޑީޕީގެ ޗެއާޕާސަން ކަމުގެ މަގާމަށް ބޭފުޅަކު އައްޔަންކުރުމަށް މިއަދު ބޭއްވި އިންތިހާބުގައި މި މަގާމަށް ވާދަކޮށްފައިވަނީ އިކޮނޮމިކް މިނިސްޓަރު ފައްޔާޒް އިސްމާއީލް އާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އެވެ.
"ސީއެންއެމް"އަށް ދެއްވި އިންޓަރވިއުއެއްގައި އިމްތިޔާޒް ފަހުމީގެ ތަރުޖަމާން، އުނގޫފާރުދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވީ މި އިންތިހާބުގައި ގިނަ މައްސަލަތަކެއް ހުރިކަން ފާހަގަކުރައްވާފަ އެވެ.
ވައްޑެ ވިދާޅުވީ "އިންތިހާބުން ބަލިވެއްޖެނަމަ ބަލި ގަބޫލުކުރައްވާނެ" ކަމަށެވެ. ނަމަވެސް މި އިންތިހާބުގައި ސުވާލު އުފެދޭ ގިނަ ކަންތައްތަކެއް ހުރި ކަމަށެވެ.
މިއަދު ހަވީރު އިންތިގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ވަކީލް މުހައްމަދު ނިޝާން އިބްރާހިމް ވިދާޅުވީ ވޯޓުލާ ވަގުތު އިތުރު ކޮށްފައިވާކަން ޕާޓީން އަންގާފައިވަނީ ވޯޓުލާ ވަގުތު ހަމަވިފަހުން ކަމަށެވެ. ނިޝާން ވިދާޅުވީ އެއީ ގާނޫނީ ގޮތުން ކުރެވޭނެ ކަމެއް ނޫން ކަމަށެވެ.
އިންތިގެ ޓީމުން ވަނީ ވޯޓުލީ ވަގުތު ވޯޓަށް ނުފޫޒު ފޯރުވުމަށް އިދިކޮޅު ކެންޑިޑޭޓުގެ ޓީމުން މަސައްކަތްކޮށްފައިވާކަމަށް ތުހުމަތުކޮށްފަ އެވެ. އެގޮތުން އައިޑީކާޑް ގަތުމާއި، ފައިސާ ބެހުމާއި، ނުފޫޒު ފޯރުވުމުގެ ޝަކުވާތައް ލިބިފައިވާކަން އިންތިގެ ޓީމުން ފާހަގަކޮށްފައިވެ އެވެ.
އިންތިގެ ޓީމުން މިހާރުވަނީ މި ޝަކުވާތަކުގެ މައްސަލަ ބަލައިދިނުމަށް އެމްޑީޕީގެ އިންތިހާބާއިބެހޭ ކޮމެޓީއަށް ހުށައަޅާފަ އެވެ.
