އެމްޑީޕީގެ ޗެއާޕާސަން އިންތިހާބުގެ ވޯޓުގެ ވަގުތީ ނަތީޖާގައި ފައްޔާޒަށް ކުރި ލިބިފައިވާތީވެ އެކަމުގެ އުފާ ފާޅުކުރުމަށް ސަޕޯޓަރުންނާއި ބައްދަލުކުރައްވައި މިރޭ ފައްޔާޒު ވިދާޅުވީ އެޕާޓީގެ ޗެއާޕާސަން އަކީ އެމަނިކުފާނު ކަމަށެވެ. އަދި ކުރިއަށް އޮތް ތަނުގައި އެ ޕާޓީ "ހިންގާލާނެ" ކަމަށެވެ.
ފައްޔާޒު ވިދާޅުވީ އެމްޑީޕީ ބައިބައިވެ ފަޅިވެދާނެ ކަމުގެ ކުޑަވެސް ޝައްކެއް ނެތްކަމަށެވެ. އަދި އެންމެ އިސްކަމެއް ދެއްވާނީ ޕާޓީގެ އިދާރީ ކަންކަން ހަރުދަނާކުރުމަށް ކަމަށެވެ.
ފައްޔާޒު ވިދާޅުވީ މި އިންތިހާބުގައި ނާކާމިޔާބުވި ކަމުގައިވިނަމަވެސް އިމްތިޔާޒު ފަހުމީވެސް އަދި ރައީސް ނަޝީދުވެސް ދޫކޮށް ނުލައްވާނެ ކަމަށެވެ. އަދި ސިޔާސީ މަސައްކަތްތަކުގައި އެފަރާތްތަކާއި އެކު ގުޅިގެން މަސައްކަތްކުރުމަށް ތައްޔާރަށް ހުންނެވި ކަމަށެވެ.
މީގެ އިތުރުން ފައްޔާޒް ވިދާޅުވީ، އެމްޑީޕީ މެމްބަރުން މި އިންތިހާބުގައި ދައްކައިދިނީ ރައީސް އަށް އިތުރު ދައުރެއް ދޭން ބޭނުންވާ ކަން ކަމަށެވެ. އަދި އިންތިހާބުގެ ނަތީޖާއާމެދު ސުވާލު އުފައްދާ މިންވަރަށްވުރެ ތަފާތުބޮޑު ނަތީޖާއެއް ލިބިފައިވާ ކަމަށް ފައްޔާޒް ވިދާޅުވި އެވެ.
