ޝަންގްރިއްލާ ރިސޯޓް ނުހުޅުވި ލަސްވަމުން ދިއުމާއި ގުޅިގެން ރައްޔިތުންގެ މަޖިލީހުގެ މެމްބަރުން މިއަދު ކުރެއްވި ސުވާލަށް ޖަވާބު ދެއްވަމުން މިނިސްޓާ ނަސީމް ވިދާޅުވީ، ހަދާފައި ހުންނަ އެއްބަސްވުން ތަކުގެ ސަބަބުން ދައުލަތަށް އޭގެ ސަބަބުން ގެއްލުން ވަމުން އަންނަ ކަމަށެވެ. އަދި ބައެއް އެއްބަސްވުން ތަކުގެ ސަބަބުން ބޮޑެތި އަދަދުތަކުން ދައުލަތުން ފައިސާ ދައްކަން ޖެހޭ ކަމަށްވެސް މިނިސްޓަރު ވިދާޅުވި އެވެ.
މިނިސްޓާ އިތުރަށް ވިދާޅުވީ، ދިވެހި ސަރުކާރުން ޝަންގްރިއްލާއަށް 68 މިލިއަން ޑޮލަރަށް ވުރެ ބޮޑު އަދަދެއް ދައްކަން ޖެހޭ ކަމަށާއި، އެމީހުން ނަގާފައިވާ ލޯނުގެ 30 އިންސައްތަ އާއި ސަރުކާރުން ހަވާލުވާން ޖެހޭ ކަމަށެވެ.
މީގެ އިތުރުން މިނިސްޓާ ވިދާޅުވީ، ޝަންގްރިއްލާ ރިސޯޓު ހުޅުވަން މިހާރުވެސް ގިނަ މަސައްކަތްތަކެއް ކުރަމުން އަންނަ ކަމަށާއި، އެގޮތުން މިހާރުވެސް ރައްޔިތުންގެ މަޖިލީހަށް ރިސޯޓުތަކުގައި އޮންނަ ސަރުކާރުގެ ހިއްސާ ބަދަލު ކުރެވޭނެ ރަނގަޅު އުސޫލެއް ހެދުމަށް ހުށަހަޅާފައި ވާކަމަށެވެ.
ޝަންގްރިއްލާ ރިސޯޓް ބަންދު ކުރީ 2020 ވަނަ އަހަރުގެ އޮގަސްޓު މަހުގެ ތެރޭގައެވެ. އޭގެ ފަހުން އެކި ފަހަރު މަތިން އެ ރިސޯޓު ހުޅުވާނެ ކަމަށް ސަރުކާރުން ވަނީ ބުނެފައެވެ. އެހެން ނަމަވެސް އެކި ސަބަބު ތަކާއި ހެދި އަދިވެސް އެ ރިސޯޓު ވަނީ ބަންދު ކޮށްފަ އެވެ.
