- މޯލްޑިވްސް އޮލިމްޕިކް ކޮމެޓީން އިސްނަގައިގެން ޖެންޑާ މިނިސްޓަރީއާ ގުޅިގެން މިއަދު ކުރިއަށްގެންދިޔަ "ޗައިލްޑް ސޭފްގާޑިން ޕޮލިސީ" އިފްތިތާހުކުރުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މަދުން ނަމަވެސް ކުށުގެ ވެށީގައި ކުޑަކުދިން އުޅޭ ކަމަށެވެ.
ކުޑަކުދިންގެ ރައްކާތެރިކަމަށް ނުރައްކާތެރި އެތައް ކަމެއް އޮތްކަން ފާހަގަކުރައްވަމުން ރައީސް ވިދާޅުވީ ކުޑަކުދިންގެ ހިމާޔަތާއި ރައްކާތެރިކަމަށް ބޭނުންވަނީ މުޖުތަމައުގެ އެއްބާރުލުން ކަމަށާއި، ސަރުކާރުގެ އިދާރާތަކުންނާއި އަމިއްލަ ކުންފުނިތަކުންވެސް އެހީތެރިކަން ބޭނުންވާ ކަމަށެވެ.
ޗައިލްޑް ސޭފްގާޑިން ޕޮލިސީ އިފްތިތާހު ކުރުމުގެ މައްޗަށް އަލިއަޅުވާލައްވައި ވާހަކަފުޅު ދައްކަވަމުން ރައީސް ވިދާޅުވީ ކުޑަކުދިންނަށް ރައްކާތެރި މާހައުލެއް ގާއިމުކޮށްދޭންޖެހޭ ވާހަކަ މިދައްކަވަނީ ކުޑަކުދިން ހިމާޔަތް ކުރުމަށް ވަރަށް ބޮޑަށް އަޑުއުފުލާ ދުވަސްވަރެއްގައި ކަމަށެވެ. އަދި އެއީ ސަރުކާރުންވެސް ވަރަށް ބޮޑު އިސްކަމެއްދޭ ކަމެއް ކަމަށެވެ.
މި ރަސްމިއްޔާތުގައި ރައީސް ވިދާޅުވީ މައިންބަފައިންގެ ލޯބި ނުލިބި ދައުލަތުގެ ބެލުމުގެ ދަށުގައިވެސް އެތައް ކުޑަ ކުދިންނެއް ތިބިކަން ފާހަގަ ކުރައްވައި އެކަމަކީ ހިތާމަހުރި ކަމެއްގެ ގޮތުގައި ރައީސް ފާހަގަކުރައްވާފަ އެވެ.
ރައީސް ވިދާޅުވީ ކުޑަކުދިންނަށް އަމާން ވެއްޓެއް ގާއިމުުރުމަށް ސަރުކާރުގެ އެންމެހައި އިދާރާތަކެއްގެވެސް އެހީތެރިަން ލިބޭނެ ކަމަށެވެ.
މިއަދުގެ މި ބައްދަލުވުމުގައި ޖެންޑަރ މިނިސްޓްރީގެ އިސް ބޭފުޅުންނާއި މޯލްޑިވްސް އޮލިމްޕިކް ކޮމެޓީގެ އިސްބޭފުޅުން ބައިވެރިވެފައިވެ އެވެ.
