ވޯލްޑް ކަޕް ކާމިޔާބުކުރި ޕޯލް ޕޮގްބާ ބައިވެރިވާ ފިލްމުގެ ޝޫޓިންތައް މިހާރު ފަށާފައިވާއިރު، ބެލެވޭ ގޮތުގައި މި ފިލްމް އަންނަ އަހަރުގެ އޭޕްރީލް މަހު ރިލީޒް ކުރާނެއެވެ.
ޕޮގްބާ ކުޅެފައިވާ ފްރެންޗް ފިލްމަށް ކިޔަނީ ފޯ ޒީރޯސްއެވެ. މިއީ 2002 ވަނަ އަހަރު ރިލީޒްކުރި ކާމިޔާބު ތްރީ ޒީރޯސްގެ ސީކުއެލްއެކެވެ.
މި ފިލްމުގައި ޕޮގްބާގެ ރޯލާ ބެހޭ ގޮތުން އެންމެ ފުރަތަމަ ރިޕޯޓްކުރި ފްރާންސްގެ އައުޓްލެޓް ލެ ޕެރިސިއަން އިން ބުނާ ގޮތުގައި އުމުރުން 31 އަހަރުގެ ޕޮގްބާ ކުޅޭނީ ޔޫތު ޓީމް ފުޓްބޯޅަ ކޯޗެއްގެ ރޯލެވެ.
މަނާ ބޭސް ބޭނުންކުރިކަން ސާބިތުވެ ޕޮގްބާ އަންނަނީ ހަތަރު އަހަރުގެ ސަސްޕެންޝަނެއް ފުރިހަމަ ކުރަމުންނެވެ. އިޓާލިއަން ލީގުގައި މިދިޔަ އަހަރުގެ ސެޕްޓެމްބަރު މަހު ޔުވެންޓަސްއާ އުދިނޭޒީ ކުޅުނު މެޗަށް ފަހު ހެދި ރެންޑަމް ޑޯޕިން ޓެސްޓްތަކުން ޕޮގްބާ ފެއިލްވުމާއެކު އޭނާ ހުރީ ސަސްޕެންޑްކޮށްފައެވެ. އަދި އޭގެ ފަހުން އިތުރު ޑޯޕިން ޓެސްޓްތަކެއް ހެދިއިރުވެސް މަނާ ބޭހަކަށް ޕޮޒިޓިވްވުމާއެކު އެ މައްސަލަ ބެލުމަށް ފަހު ހަތަރު އަހަރުގެ ސަސްޕެންޝަން އަދަބެއް ޕޮގްބާއެއް ދިނީއެވެ.
އިޓަލީގެ ނެޝަނަލް އެންޓި ޑޯޕިން އޮގަނައިޒޭޝަނުން ދިން މި އަދަބު ޕޮގްބާގެ ފަރާތުންވަނީ އިންޓަނޭޝަނަލް ސްޕޯޓްސް ކޯޓް އޮފް އާބިޓްރޭޝަންގައި އެޕީލް ކޮށްފައެވެ. ޕޮގްބާ ބުނެފައިވަނީ އޭނާ ގަސްތުގައި މަނާ ތަކެތި ދުވަހަކުވެސް ބޭނުން ނުކުރާ ކަމަށެވެ.
