އެވާހަކަތައް ސީއެންއެމްއަށް ކިޔައިދެމުން ދިޔައިރުވެސް ނޭވާ ކުރުވާތީ ރަނގަޅަށް އޭނާ އަށް ވާހަކައެއް ނުދެއްކެއެވެ. ނަމަވެސް ހިތްވަރާއިއެކު އެ ވާހަކަތައް ހިއްސާ ކުރަމުން ދިޔައެވެ.
ނައުޝާ ބުނީ އެ ބަލި ބޮޑުވެގެން ދިޔައީ މިދިޔަ އަހަރު މެދެއްހާ ހިސާބުގައި އޭނާ އަށް ކޮވިޑް ޖެހުމުން ކަމަށެވެ. ކޮވިޑް ޖެހުނު ފަހުން ވަރަށް ބޮޑަށް ނޭވާ ހާސްވެ މެއަށް ތަދުވި ކަމަށާއި، އޭގެ ފަހުން ގާތްގަޑަކަށް ހަމަސް ފަހުން މިއަހަރުގެ ޖެނުއެރީ މަސްތެރޭ ކުއްލިއަކަށް ނޭވާ ހާސްވާން ފެށީ ކަމަށް ނައުޝާ ބުންޏެވެ.
"މި ބައްޔަކީ ކޮވިޑްގެ ސަބަބުން ދިމާވި ބައްޔެކޭ ޑޮކްޓަރު ވިދާޅުވެފައި ނުވޭ. ނަމަވެސް މި ބައްޔަށް ބޮޑުވަރުވީ ކޮވިޑްގެ ސަބަބުން ވެދާނެ ކަމަށް ޑޮކްޓަރުން ލަފާކުރޭ،" ނައުޝާ ބުންޏެވެ.
ނައުޝާ ކިޔައިދިން ގޮތުން ނޭވާ ހާސްވެ މާ ބޮޑަށް ކެތް ނުވާ ވަރުވެ ޑޮކްޓަރަށް ދެއްކުމުން އޭޑީކޭއިން ސިޓީސްކޭނެއް ހެއްދުމަށްފަހު ލަފާދިނީ ފުއްޕާމޭގައި "ފާރު ކޮޅެއް" ހުރުމުން އިތުރު ޓެސްޓްތަކެއް ހެދުމަށެވެ.
އޭޑީކޭގެ ފުއްޕާމޭގެ ހާއްސަ ޑޮކްޓަރު އެގޮތަށް ވިދާޅުވުމުން ޖެނުއެރީ މަހު ކުރީކޮޅު ވީހާ އެންމެ އަވަހަކަށް އާއިލާ އިން ނައުޝާ ގޮވައިގެން އިންޑިއާ އަށް ދިޔަ ކަމަށާއި، އޭގެ ފަހުން މިހާރު ފަސްމަސް ވެފައިވާއިރު އަދިވެސް ބަލީގެ ފަރުވާ އަށް މާބޮޑު ކުރިއެރުމެއް ލިބިގެން ނުދާ ކަމަށް އޭނާ ބުންޏެވެ. ނަމަވެސް ފަރުވާއަށްފަހު ކުޑަކޮށް ހިނގޭ ކަމަށް ނައުޝާ ބުންޏެވެ.
ފަަސް މަސް ވަންދެން އިންޑިޔާގައި ތިބުމަށްފަހު މާލީ ހާލަތު ދަށްވެ އެކޮޅުގައި ނޫޅެވިގެން މި މަހުގެ 11 ވަނަ ދުވަހު މާލެ އައިގޮތަށް އޭނާ މިވަގުތު އުޅެމުން ދަނީ ހުޅުމާލެ ދެވަނަ ފިޔަވަހީގައެވެ.
ނައުޝާ ބުނީ އިންޑިއާގައި ހޭދަވީ ފަސް މަސްތެރޭގައި އޭނާގެ ބޭސްފަރުވާއަށާއި ދަތުރުތަކަށް އެކި ފަރާތްތަކުގެ އެހީތެރި ކަމާއި އެކު 48،000 ޑޮލަރު ހަރަދުވެފައިވާ ކަމަށެވެ.
އާސަންދަ ލިބުމުގެ ދަތިކަން ހުރި ކަމަށް ބުނެ ނައުޝާ ބުނީ، ފަރުވާއަށް އާސަންދައަށް އެދުނު ނަމަވެސް އާސަންދަ ވެސް ލިބޭގޮތް ވަނީ ނުވެފަކަމަށާއި، އަދި އެންސްޕާގައި އެހީއަށް އެދި ބިލްތައް ހުށައެޅުމުން ފުރަތަމަ ދިނީ 1500 ޑޮލަރު ކަމަށެވެ.
ކޮންމެ ގޮތެއް ހަދާފަ ނަމަވެސް އިންޑިއާ އަށް އަދި ދެމަސްފަހުން ނައުޝާ އެބަ ދާންޖެހެއެވެ. އަދި ބާރުގަދަ އިންޖެކްޝަން ތަކެއްވެސް ބޭނުން ކުރަން ޖެހޭ ކަމަށް އޭނާ ބުންޏެވެ.
"އޭގެ ޖެހޭ ހަ ޑޯޒް ޖަހަން. ޖަހާ ކޮންމެ ޑޯޒަކަށް 3000 ހާސް ޑޮލަރު އަރާ. ހުރިހާ ޑޯޒެއް ހަމަ ކޮށް ޓްރީޓް މެންޓް ތަކަށްފަހު ރަނގަޅު ނުވެއްޖިއްޔާ ޓްރާންސް ޕްލާންޓް ހަނދަން ޖެހޭނެ ކަމަށް ޑޮކްޓަރު ވިދާޅުވި" ނައުޝާ ބުންޏެވެ.
އިންޑިޔާއިން ރާއްޖެ ފޮނުވީ އަދި ދެމަސް ފަހުން އެ ކޮޅަށްދާ ގޮތަށް ކަމަށް ނައުޝާ ބުންޏެވެ. އަންނަ ޖުލައި މަހު އިތުރު ބޭސްފަރުވާއަށް ބެންގަލޫރަށް ފުރަންޖެހޭ ނައުޝާ ބުނީ އޭނާގެ ބައްޔަށް ޑޮކްޓަރުން މިހާރު ލަފާ ދެއްވާ ގޮތަށް ފަރުވާ ކޮށްގެން ރަނގަޅު ނުވެއްޖެ ކަމުގައިވާނަމަ އޭނާގެ ބައްޔަށް އަށް އޮތް ހަމައެކަނި ފަރުވާއަކީ ޓްރާންސް ޕްލާންޓް ހެދުން ކަމަށެވެ.
އަދި ބޭސްފަރުވާ އާއި ޓެސްޓްތަކަށް 60،000 ޑޮލަރަށް ވުރެ ގިނައިން ހަރަދުވާނޭކަމަށް ނައުޝާ ބުނެއެވެ.
ނައުޝާއި އޭނާގެ ފިރިމީހާއި އެދެމީހުންގެ ހުރި ހަމައެކަނި ދަރިފުޅާއިއެކު--
ދިރިހުންނަން ބޭނުންވަނީ، ދަރިފުޅާއި ފިރިމީހާއަށްޓަކައި
ނައުޝާގެ ބުނީ އޭނާ ކިތަންމެ ބަލި ނަމަވެސް ފިރިމީހާގެ އޯގާތެރިކަމާއި އަޅާލުން އިންތިހާ އަށް ލިބޭ ކަމަށާއި، އެފަދަ ފިރިއެއް ދެއްވީތީ ހެއްދެވި ފަރާތަށް ޝުކުރުވެރިވާ ކަމަށެވެ.
ނައުޝާގެ ހަ އަހަރުގެ ލޯބި ލޯބި ކުޑަ އަންހެން ކުއްޖެއް އެބަ ހުއްޓެވެ. މިއަދު ނައުޝާ ބަލިހާލަތާއި އެކުވެސް އެ ދަރިއަށްޓަކާ ދުނިޔޭގައި ހުރުމަށް އިތުރަށް އެންމެ ނޭވާއެއް ލެވުނަސް ލާން އޭނާ ބޭނުން ވެއެވެ.
"މިއަދު ދުނިޔޭގައި މި ހުންނަނީ އެދަރިންމަށްޓަކާ. އެ ދަރިފުޅުދޭ ހިތްވަރުން. ބުނާނެ ކޮށްކޮ ނިދާނީ މަންމި ނިދީމައޭ. ކޮށްކޮ ހުންނަނީ މަންމިގެ ޑިއުޓީގައޭ. ބުނާނެ ޑެޑީ އާއި މަންމި އާއެކު ބޭރަށް ބުރު ޖަހާލަން ވެސް ދާން ބޭނުމޭ." ނައުޝާ ދުނިޔޭގައި ހުންނަން ބޭނުންވަނީ އޭނާގެ ހަ އަހަރުގެ ތުއްތު ފުރާނަ އަށްޓަކާ ކަމަށް ނައުޝާ ބުންޏެވެ.
އޭނާގެ ހުރި ހަމައެކަނި ދަރިފުޅު ލީން އާއި އެކު: ފޮޓޯ/ ސީއެންއެމް
މަންމަޔާއި ދެފަރާތުގެ އާއިލާއިން ފެށިގެން ރަށު ކައުންސިލުން ވެސް އެތައްގުނަ އެހީތެރި ކަމެއް ފޯރު ކޮށްދިން ކަން ފާހަގަކޮށް ނައުޝާ ބުނީ، އެ ދެއްވި އެހީތެރިކަން ދުވަހަކުވެސް ހިތުން ފިލައިގެން ނުދާނެ ކަމަށެވެ. ނައުޝާ އެދެނީ އެހީދެވެން ނެތް ފަރާތަކުން ވެސް އޭނާ އަށް ހެޔޮ ދުއާ ކޮށްދިނުމަށެވެ.
ސީއެންއެމް އެހީ މި ސެގްމަންޓްގެ ދަށުން ގެނެސްދޭ ފަރާތްތަކަށް އެހީތެރިވުމަށް އެދޭ ފަރާތްތަކުން އެ އާއިލާއާ ގުޅައިގެން އެހީގެ ކަންކަން ކުރިއަށް ގެންދިއުން އެދެމެވެ.
- ގުޅޭނެ ނަމްބަރު 9758803 (ނައުޝާ އިރުޝާދު)
- އެކައުންޓް ނަމްބަރު: ބީއެމްއެލް ދިވެހި 7703532478101 (ނައުޝާ އިރުޝާދު)
