ރަޝިއާއިން ދުނިޔޭގެ ބާޒާރަށް ނެރޭ ތެލުގެ އަގު މަދުކުރުމަށް ޔޫރަޕިއަން ޔޫނިއަނުން ވަނީ ނިންމާފަ އެވެ. އެއާއި އެކި ރަޝިއާއިން ނެރޭ ތެލުގެ މިންވަރު 90 އިންސައްތަ ދަށްވާނެ އެވެ.
އީޔޫއިން މިގޮތަށް ނިންމުމާއި ގުޅިގެން މިހާރު ދުނިޔޭގެ ބާޒާރުގައި ސާފު ނުކުރާ ތެޔޮ ފީފާއެއްގެ އަގު ވަނީ 122.30 އެމެރިކާ ޑޮލަރަށް އުފުލިފަ އެވެ. އަދި ކުރިއަށް ހުރި މަދު ދުވަސްތަކުގެ ތެރޭ ސާފު ނުކުރާ ތެޔޮ ފީފާއެއްގެ އަގި 154 އެމެރިކާ ޑޮލަރަށް ބޮޑުވެގެން ދާނެ ކަމަށް މަސްރަހު ދިރާސާ ކުރާ ފަރާތްތަކުން ވަނީ ލަފާ ކޮށްފަ އެވެ.
އޫޔޫއިން ރަޝިއާއިން ނެރޭ ތެޔޮ ބާޒާރަށް ނެރުން މަދުކުރަން ނިންމާފައި ވާއިރު، އޮގަނައިޒޭޝަން އޮފް ދަ ޕެޓްރޯލިއަމް އެކްސްޕޯޓިންގް ކަންޓްރީސް (އޯޕެކް) އިން ވެސް ދަނީ ތެޔޮ އުފައްދާ ޑީލްތަކުގައި ރަޝިއާ ބައިވެރިކުރުން ހުއްޓާލުމަށް މަސައްކަތް ކުރަމުންނެވެ.
ދުނިޔޭގެ ބާޒާރުގައި ތެލުގެ އަގު އުފުލުމާއި ގުޅިގެން މަސްރަހު ދިރާސާ ކުރާ ފަރާތްތަކުން ވަނީ، މިއީ މުޅި ދުނިޔެއަށް ދިމާވެދާނެ އިގްތިސާދީ ކާރިސާއެއްގެ ގޮތުގައި ސިފަކޮށްފަ އެވެ. އަދި މިކަމުގެ ސަބަބުން މެދު ފަންތީގެ ގައުމުތަކާއި، ކުދި ގައުމުތައް އިނދަޖެހިދާނެ ކަމަށްވެސް އެފަރާތްތަކުން ވަނީ ލަފާ ކޮށްފަ އެވެ.
